有個客雖然參加咗我哋嘅speed dating，不過最後佢同咗自己公司同事拍拖，其實咩途徑都唔緊要，最緊要係佢搵到另一半，更何況我聽完個故事之後覺得冇揀錯，雖然過程係特別啲，或者好多爭議聲音，所以寫出嚟等大家睇下。
「經過嗰件事之後，個個同事都話佢份人好衰，偏偏我就覺得呢個男仔好正，然後就有好感喇。」初初聽到呢位叫Jessica嘅女會員咁樣形容，坦白講我個心係涼咗一截，唔通就係嗰啲人人都憎嘅賤男，偏偏Jessica覺得男人唔壞，女人唔愛？
聽返Jessica講，早排佢哋成班同事出去食lunch，當時左右兩枱都分別有兩個家庭，各自有一個小朋友，約莫5至7歲左右，雙方係唔認識嘅，不過其中一枱個男仔小朋友好百厭，係咁走嚟走去，侍應都開咗聲，可惜個阿媽都唔理，繼續同同枱個男人傾計（應該係佢老公）。
後來個男仔小朋友仲百厭到跑去撩另一張枱個女仔小朋友，但就唔係一般細路仔嗰種玩，而係去個女仔耳邊好大聲咁大嗌「嘩！」即係嚇人嗰種，Jessica話同事呢枱全部係大人都嚇親，所以個女仔小朋友直頭嚇到喊，真係耳膜都穿。
呢個情況唔止一次，就算個女仔小朋友已經坐得好唔安樂，不過個男仔小朋友仍然來來回回走去佢度大嗌，見個女仔咁驚，呢個小頑童仲好得戚咁講：「咁渣㗎你，咁都驚，哈哈！」Jessica都開口勸過男仔個媽媽睇住小朋友，但係對方答：「小孩子玩玩罷了，不用管。」
Jessica：「個男仔嘅阿媽係講普通話，我唔係歧視，講咩話都好，麻煩你睇住個細路啦，嚇到人哋喊，又走嚟走去，侍應成日拎住啲餸同埋熱水，一陣有咩意外都唔好啦，個女人真係完全唔理㗎喎！」
當佢哋食完lunch埋單走嘅時候，個小頑童啱啱又去完個女仔度大嗌，Jessica嘅男同事阿Sam唔知幾時行咗去小頑童後面，有樣學樣咁喺後面大嗌一聲：「嘩！」
小頑童嚇到彈起然後喊，似足頭先個女仔畀佢嚇咁樣，跟住小頑童媽媽終於有反應喇，向住阿Sam講普通話：「你這個人幹嘛！」
Jessica話阿Sam用啲輪胎輪嘅音調回答：「跟燒hai子玩玩爸了。」
其他同事見到之後都責備阿Sam好衰，話佢冇愛心嚇細路，但係呢個細路走去嚇個女仔嘅時候呢，佢哋就視若無睹。
Jessica：「我知道班侍應都好嬲小頑童個阿媽，不過勸又勸過，而且身份上冇得鬧個客，所以有個侍應見到阿Sam嚇個小頑童都陰陰嘴笑，反而係班同事勁廢，唔敢出聲仲批評阿Sam。」
我：「就係咁，你就覺得阿Sam好正？」
Jessica：「唔正咩？」
我：「係幾正嘅。」🤣
因為呢一件事，Jessica對阿Sam有好感，大家沿途行返公司仲傾得好開心，日子耐咗就愈嚟愈熟，到最後喺埋一齊，其他同事知道咗就質疑佢唔識揀男朋友，不過Jessica一於少理，同邊個拍拖使咩理張三李四嘅意見。
唔知大家聽完之後會覺得阿Sam好衰定係好正，但係我就覺得唔錯，所以Jessica冇揀到Speed dating嘅男會員我真係冇介意，有咩緊要得過兩個人啱key同埋價值觀一致吖！