我間公司喺上環，10個人都唔夠，所以有種家庭式嘅感覺，所謂家庭式，係因為老闆娘個仔放學後會上嚟office做功課，呢度仲有啲師奶同事會趁lunch去買餸，真係好隨意，講真個氣氛都幾easy嘅。
有一日老闆娘個仔唔識做功課，佢首先問完我隔籬位個師奶同事，但因為答唔到佢，結果佢個仔就行埋嚟問我，教完一次之後，呢位小朋友日日走埋嚟問功課，條數點計又問，英文生字點讀又問，好多時都要停低公事去答。
估唔到小朋友原來有返去同老闆娘講，有一次老闆娘見個仔又問緊功課就行過嚟講：「你成日阻住姐姐做嘢，有冇講唔該㗎！」
佢個仔冇答，反而係我答老闆娘：「有呀，佢每次都有講㗎！」
老闆娘：「我聽Louis講你教得佢好好喎，仲好過之前個補習阿Sir，佢有晚返到屋企同我講好鍾意你。」Louis係老闆娘個仔嘅英文名。
然後我隔籬位個師奶同事好似知好多嘢咁，忽然又搭嘴：「叫咗你唔好亂搵上門補習啦，好多都呃錢㗎！」
老闆娘：「係囉，Louis話個補習哥哥一路同佢溫書一路玩電話，應該係知道冇大人喺屋企，諗住求求其其，嬲嬲地我咪叫佢唔使再補囉，而家嗌Louis放學就上嚟office做功課，起碼我哋可以睇住吖嘛！」
就喺老闆娘同師奶同事傾計嘅時候，Louis又叫我教佢英文，呢個時候老闆娘唔知點解忽發奇想講咗句：「不如Sarah你做Louis嘅補習老師啦，佢都係鍾意女仔多啲㗎喇，我發覺之前搵啲男補習老師都同佢唔多夾。」
我：「補習我就唔得，都未同人哋補過，Louis有咩唔識咪隨便問我囉！」
老闆娘：「你全職同佢補啦，朝早做公司嘢，下晝教佢做功課咪得囉！」
我：「吓！我驚我唔識教喎！」其實我係驚緊工作量會加倍呀！真係做半晝就收工咩，到時做唔晒啲嘢，又要幫你個仔補習，我一路做一路教，到頭來咪玩死自己，唔好啦！
隔籬位個師奶同事：「得喎！Sarah細心呀，又好脾氣，喺公司補習你又可以睇住，咁咪唔使擔心囉！」
呀師奶，你邊位呀？我自己嘅事可唔可以交畀我決定呀？
老闆娘：「都係唔好喇！」
以為老闆娘終於知道唔work，講返句似人嘅說話，點知佢下一句仲爆……
老闆娘繼續：「我另外請個會計咪得囉，Sarah你主力幫Louis補習，啲嘢畀晒新嚟嘅會計，你人工一樣，就咁啦！」
因為我唔相信老闆娘係認真，所以一時唔識得反應，結果佢真係請多咗個會計返嚟。
事情嘅發展係，新嚟嘅會計take over咗我啲工作，係間唔中有唔明會問我幾句，但基本上我成朝都好得閒，得閒到點呢，直頭坐喺個位度睇YouTube都冇人理，食完lunch返嚟再過多陣就開始忙喇，因為老闆娘個仔Louis會上嚟office，我同佢一對一溫書做功課，我嘅job duties由會計變咗做補習老師。
後來我搵老闆娘好認真咁傾，仲苦口婆心勸佢不如正正經經搵個補習老師啦，先唔計咩玩電話呃鐘，其實補習都需要專業㗎，我呢啲客串身份其實好業餘，教唔到佢個仔啲咩㗎喎！
我：「唔係哩，你諗下，雖然我junior啫，但人工都萬幾蚊，你搵正式補習老師肯定唔使呢個價錢，你而家仲要請多個會計，點都唔伐算啦！」
老闆娘：「數係咁計，不過Louis唔係人人都跟，唔係個個教都會聽，你知唔知佢成日喺屋企讚你㗎，佢真係好鍾意你教佢做功課，我仲留意到Louis成績好咗好多，你咪當幫下我囉，人工我都唔介意啦，你唔使介意喎，今年你係新人，雙糧就係按比例，但係下年雙糧都係一樣咁多，我唔會因為你幫Louis補習就唔畀你㗎，公司啲福利都係一樣之嘛！」
我：「呢個offer係吸引，但係我做會計……」
老闆娘：「哦，以為驚咩，你個title都係會計嚟㗎，冇變吖，就算第日你同我講辭職，我封信都會寫住你做會計㗎啦，你知啦，呢度又唔大，你要我出封信話你喺度做總經理都得㗎，好易話為之嘛！封信我打嘅，我係老闆鍾意話你做咩職位都得㗎啦！」
呀……佢講到咁，我應該得返兩條路可以揀，一係唔做，一係繼續「掛會計嘅羊頭，賣補習嘅狗肉」。
作為一個會計，其實我自己都計過數，而家朝早睇戲煲劇完全冇人理，下晝先幫Louis補習，基本上只係返半日工，但係就逗一份full time糧，仲老奉唔使OT，感覺上係幾爽嘅，問題係工作內容完全偏離會計嗰行，話就話reference letter任老闆娘打啫，我都擔心自己會脫節或者將來再搵工唔適應，係咪我自己諗得太多太長遠呢？係咪唔使理繼續做住先呢？最近因為呢個問題覺得好迷惘，同時都好迷失。（完）
老闆嘅奇怪思維，我哋平凡人真係未必會明，記唔記得以下兩段2021年嘅舊文？焗同事行山個story已經被好多媒體轉載過，相信你或多或少都會有啲印象。
《老闆自資出書迫人買 每個員工要認購一本》
https://hkofficedaily.com/?p=19500
《老闆焗同事行山 送裝備迫人陪玩》
https://hkofficedaily.com/?p=19440
《辦公室日報》YouTube就快又有新一集喇，如果未睇之前兩集嘅男公關招募人訪問，記得快啲去睇同埋撳鐘仔🔔，咁下次有新片你就會即刻收到通知。
https://youtu.be/-50oZUjrmxo