《意外》上集 離世猝不及防 後續更加荒唐

「下星期Kamila生日,你覺得我應該買咩禮物畀佢好呀?嗰啲永生花好似太老氣,香水又唔知佢鍾意咩味,唇膏更加唔識揀啦,幾廿隻色,好似隻隻都差唔多咁,你估送花嚟公司好唔好呢?送嘢畀呢啲妹妹仔真係難諗呀呵,你有冇咩提議呀?」

同我講呢番說話嘅人係同事景宇,佢同我一樣啱啱年過半百,不過景宇keep得好啲,望落去似四十出頭,而佢口中嘅妹妹仔Kamila亦係我公司另一位女同事,好似得24歲,對我同景宇嚟講當然係妹妹仔啦,年齡差一個double喎,出街話係父女都唔過份。

50歲嘅景宇同24歲嘅Kamila又係同事又玩父女戀好過份?聽埋先評價都未遲,年齡係一個問題,但最大問題係景宇同我一樣,其實已經結咗婚,我哋都係人夫,分別只係我冇仔女,而景宇就有個16歲讀緊中學嘅仔。

Kamila未結婚,不過呢位「妹妹仔」都有男朋友,點解我咁都會知?一來係Kamila男朋友每星期梗有一兩次喺公司樓下接放工,二來係景宇都有同我提過,佢話自己結咗婚,Kamila又有仔,大家呢種關係好刺激,又唔使上身,我覺得景宇同我分享咁多其實係曬命。

Kamila係隔籬部門,我唔知佢點解會鍾意個做得佢老豆嘅阿叔,但係景宇點解鍾意Kamila我就知,佢成日話「有食唔食罪大惡極」,仲講過我哋呢個年紀想玩妹妹仔就通常要畀錢,難得有個咁後生嘅自動送上門,仲唔會痴身,如果咁都唔去馬真係對唔住自己喎!

其實我知道景宇平時都有送好多禮物畀Kamila,嗰啲名牌手袋、銀包、散紙包、鎖匙包全部送過晒㗎喇,所以呢次Kamila生日,景宇先至送到唔知再送咩好,咁Kamila係咪為咗物質先至搭上個阿叔呢?呢層要佢自己先至清楚喇。

我曾經將景宇同Kamila呢單「辦公室不倫戀」同老婆分享,然後老婆笑笑口問過我:「你係咪唔抵得人溝到妹妹仔呀?」

我:「如果之前唔係見證咗嗰件事,可能真係會㗎!但係而家諗都唔敢諗,你知啦,意外呢啲嘢講唔埋。」

老婆:「咁你舊老細單嘢又真係太恐怖嘅,係呀,意外話唔埋,做衰嘢之前要諗清楚,紙係包唔住火㗎!」

我同老婆口中所講嘅「意外」,其實係一場意外再加幾個意外,上一份工嘅舊老細因為喺外國遇到車禍喪生,走嘅時候得45歲,可以話係非常突然。

舊老細款頭比起景宇更有型,如果一定要形容,我會話佢似洗米華,黑黑實實鋼條型,因為有做開運動,而舊老細仲有另一樣嘢比景宇更煞食,就係有錢。

喺車禍發生之前,舊老細喺我哋成班員工嘅心目中係好好先生,我從未聽過佢發火鬧下屬,大部分時間都係笑臉迎人,而且好肯聽職員意見,做事又夠搏同埋進取,見到同事無論係junior定係senior都嗌得出個名,加上舊公司做IT類別,發展前景唔錯,我曾經以為自己會喺嗰度做到退休。

舊老細因車禍離開人世好突然,不過喺佢嘅喪禮上有更突然嘅事出現,當日我哋喺公司照常工作,放工就成班同事一齊去靈堂,記得大約夜晚8點幾嘅時候,靈堂上有個女人嚟咗,踏入嚟嗰一刻已經喊到拆天,所以得到好多人嘅注視。

「Norman!點解你要咁狠心走咗去呀!我話過要同你生仔㗎!」歇斯底里咁怒吼完呢兩句之後,呢位目測約30幾歲嘅女人就放聲大哭,其實我哋成班同事或者係客戶都好少叫舊老細做Norman,一般都係嗌甘生。

可以直呼舊老細英文名一定係好熟,但你話要同佢生仔就……難怪舊老細嘅太太第一時間行上前了解,簡單咁問咗個女人一句:「你係邊個?」

個女人冇理會舊老細太太,淨係發咗癲咁話要行去後面見Norman(佢意思係指靈堂後面存放屍體嘅房),跟住就有幾個相信係舊老細嘅家人長輩走出嚟阻止。個女人顯然唔賣帳,一路試圖強行「突破防線」,一路衝住舊老細太太嚟鬧:「你都霸咗佢半世人啦!佢唔鍾意你㗎!佢話同你一早已經冇感情㗎喇!你哋呢10年都係分房瞓,佢話想同我生BB㗎!」

我相信靈堂上唔會有舊員工抱住食花心嘅心態,因為大家一直以嚟都好尊敬舊老細甘生,但突如其來嘅一幕又令所有人猝不及防,最終個女人都係被幾個人強行拉走,但係依然一直大喊大叫,如果有去過香港啲殯儀館應該都知道,一層裡面有幾個靈堂,個女人大聲到有其他靈堂啲人都走嚟望。

舊老細離開係一場意外,殯儀館呢一晚又係一個意外,但原來意外係會接二連三㗎!再之後發生嘅事更加荒唐,亦令我學識咗凡事唔好淨係睇表面,諗都冇諗過連份工都冇埋,真係殃及池魚。(未完待續)

最新嘅《辦公室日報》YouTube繼續講日本職場,今集邀請到一位居酒屋侍應接受訪問,佢會講下人工、伙食、仲有點樣畀兩個越南同事欺凌,片尾再帶你睇埋我喺東京嘅屋企。
https://youtu.be/spMC99H_nxk

error: