「我同個friend去咗你間cafe喎，唔見你嘅？今日休息呀？」事緣我早排搵咗份兼職侍應，不過返咗3個星期就辭職喇，因為有份full time見成咗，仲未嚟得切同朋友講，佢就失驚無神殺落cafe搵我，所以大家緣慳一面。
我：「上個禮拜冇做喇，我搵到份office 工，做咩唔call我先呀？最衰出咗銅鑼灣買嘢，如果唔係就過嚟同你吹下水。」其實我仲好想叫個朋友走，因為我間cafe出晒名－－－態度差，當日仲係weekend勁多人，肯定舊同事會做到發晒火。
果然不出所料，同一晚已經再收到呢位朋友嘅call：「你做過嗰間cafe呢，好似同班客有十冤九仇，我哋就咁叫兩杯Latte等咗差不多半個鐘，出去問佢拎張紙巾，個職員係唔講嘢，『褶』一聲，指住啲叉，原來有疊紙巾喺一排棟高嘅叉後面，根本睇唔到。」
我：「哦……係呀……可能忙得滯。」
「跟住又見到個職員同另一個客喺度嘈，好似話等咗好耐都未有咖啡，呢間嘢咩事呀？」
我：「正常嘅客一定會覺得呢間cafe有問題，不過你有冇留意到，由頭到尾應該得一個職員。」
「你咁講又好似係喎，沖咖啡又係個男仔，執枱又係個男仔，收銀都係個男仔。」
我：「唔止㗎，倒垃圾都係個男仔，仲有好多好多下欄嘢，其實呢間嘢個老闆好刻薄，就算係細啲嘅cafe都有兩個人，但嗰度咁大得一個人真係會做死，我同嗰個男仔之前每日得半個鐘係交接，咁都未算，老闆耐唔耐會落嚟好似突擊檢查緊，仲會當住客人面前大大聲鬧我哋，人工同福利就更加唔好講，所以我先會返咗3個星期唔做之嘛。」
「係衰，不過咁喎，如果做得唔開心咪唔好做囉，咁我哋作為客人又好無辜，冇理由老闆要你受氣，我哋又受返你氣㗎嘛，啱唔啱先？」
啱！駁唔到，無論我哋做咩行業，日常生活都有好多場合會換轉為顧客嘅身份，大家賺錢都辛苦，出去買嘢食飯仲要無啦啦受氣，的確係講唔通，難道我哋去餐廳食飯之前先問問個侍應：「點呀？老闆今日有冇畀氣你受呀？你心情ok吖嘛，唔使睇面色我就入嚟食嘢㗎喇。」
但人始終係血肉之軀，有時難免會有情緒，好似我之前做嗰間cafe咁樣，其實都係冰山一角，香港大把老闆係咁，一份糧要你做幾個人嘅嘢，待遇又唔成正比，仲要當你係狗咁，漸漸地就會出現惡性循環，畢竟每個人都有唔同性格，總有人覺得你對我差咩，咁我咪用同一個方式對返你啲客囉！你的老闆如何，你的員工也必如何。
好老土嘅一段說話，印象中辦公室日報都出現過幾次：“Clients Do Not Come First. Employees Come First. If You Take Care Of Your Employees, They Will Take Care Of The Clients.”
除咗老闆，有時啲客都會好癲，記得返cafe頭幾日遇到個阿叔，佢走埋嚟問我：「有冇Stir-fried Beef Noodles?」
我：「下？」
阿叔：「我問你有冇乾炒牛河呀？英文都唔識聽！」
唔係唔識聽，但呢度係cafe，餐牌又冇Stir-fried Beef Noodles，你嗌乜春嘢乾炒牛河呀？禮貌答返佢冇之後，阿叔就「妖」一聲走咗。
香港係一個咁細嘅地方，但西人嘅比例就特別多，呢種惡性循環嘅情況已經係地道文化，所以正常人喺呢個地方生存會特別辛苦。