世界盃終於踢到4強，呢段時間公司真係發生咗好多事，喜怒哀樂乜都有齊，零零碎碎希望唔好介意，講咗唔開心嘢先，有個同事輸好多錢，最近周圍問人借，佢同我唔熟都開口問，可想而知有幾唔掂。
十賭九輸，千古不變嘅定律，呢位同事仲要賭得好高調，日日喺公司個WhatsApp group講自己睇好邊隊同埋今晚買乜，揭幕戰第一場已經話卡塔爾畀晒錢厄瓜多爾，收買咗8個球員乜乜乜，所以重鎚卡塔爾下盤，結果……
呢位同事之後買咗幾場都贏，跟住個心又雄喇，正所謂輸錢皆因贏錢起，日本對德國嘅時候佢買德國，結果輸咗，然後開口埋口就話德國打假波，咁好啦，同組第二輪日本對哥斯達黎加，佢呢次買返日本，結果哥斯達黎加贏咗，佢又話日本打假波。
去到分組賽最後一輪，因為呢位同事兩次買日本嘅賽事都損手，所以佢好憎日本，日本對西班牙嗰場瞓身買西班牙……
「假波，一定係假波，個波明明出晒界，咁都可以話未出，呢一屆世界盃真係場場假波！」
其實呢位同事賭波真係好危險，總之輸錢嘅時候佢就會話場波係假，摩洛哥16強淘汰西班牙，假！日本對克羅地亞1:1入球細，假！連葡萄牙6:1大炒瑞士都係假，嗰次我都忍唔住喺個WhatsApp group問：「葡萄牙6:1喎！又開上盤，又開入球大，咁都係假波？」
佢答我：「有啲波就係搏你唔信吖嘛，葡萄牙最後一輪分組賽踢到pat屎咁，呢場又唔出C朗，然後讓咁多，就係想氹啲人買下盤同埋入球細，呢啲莊家嘅技倆睇慣晒㗎喇！」
其實我好想問，既然莊家嘅技倆睇慣晒……咁你又輸錢？
講開日本隊仲有兩單嘢分享，我公司喺世界盃期間有好多「忽然球迷」，即係平時唔睇唔講，本身亦都係唔識波嘅人，突然間變晒專家係咁高談闊論，其實全部都係執人口水尾，利申我係男人，不過持平講句，唔識波嘅女人問你咩係越位並唔乞人憎，最乞人憎係有啲男同事扮晒見識廣博。
「都唔知有咩好拗，都話個足球有晶片啦，側邊睇嘅角度同上面睇梗係唔一樣啦！」然後就丟晒啲外國分析影片出嚟，係咁話人唔識波，我覺得呢啲「忽然球迷」同埋「忽然專家」仲難頂過女人，得啦，你都係想人哋讚你「好叻呀！好勁呀！」，其實係「好柒呀！」
除咗「忽然球迷」，當然仲有「勝利球迷」，即係邊隊贏波同埋邊隊有話題性就捧邊隊，不過公司有條友平時係好黑仔，世界盃開始之前話想買件日本隊，由分組賽第一場日本贏波講到最後出線16強都未買，後來成班同事約去老闆屋企睇波，嗰場正正係日本對克羅地亞，呢位同事終於都買咗日本隊波衫喇，結果係點？咪日本隊輸12碼出局囉！當晚呢位黑仔同事仲同上面提及嘅賭錢同事鬧交。
「你咁黑就唔好買件日本嚟著啦，邪住晒，我賭咗㗎！」
「嘩！你輸錢賴我呀？」
「係人都知你黑仔㗎啦！上次個客你接完之後，人哋間公司直頭執埋，我真係未見過人黑成咁囉！」
「唔夠你黑，賭乜輸乜，我唔賭咋，如果跟住你買對家而家應該夠錢畀首期買樓呀！」
「你咁巴閉咪之後日日著住日本件波衫返工囉，場場都唔買，呢場16強先至嚟買，真係多得你唔少！」
佢兩個講以上對話時係完全冇笑容，絕對唔係講笑，兩個人都動晒真火，因為我哋喺老細間豪宅睇波，最後竟然勞煩老細出聲做和事佬，你話成件事幾樣衰吖！我喺側邊都睇到好尷尬，不過賭仔同事而家輸爆廠，我諗嗰位「忽然球迷」同事應該好心涼。
講完啲又嬲又慘嘅嘢，最後講返啲開心嘢啦！老細係英格蘭球迷，每逢有英格蘭出場而第日又係working day的話，老細就特准全公司home office，當然有啲同事都係照返工，不過我就真係work from home，有呢啲「德政」真係好好，可惜英格蘭噚晚畀法國淘汰出局，嚟緊要乖乖地起身準時返工。
由於成班人去老細屋企睇波，個別場次踢完都凌晨，有啲直情係凌晨3點開波，所以今屆世界盃仲造就咗一對情侶……
有個男同事鍾意咗個女同事好耐㗎喇，但係個女仔之前有男友，幾個月前分咗手，男同事口講唔想乘人之危，其實係冇膽，今次世界盃睇完波咁夜，我哋幾個知情嘅人好識做，係咁叫個男同事送個女同事返屋企，佢兩個用咗半個月時間就破冰，雖然仲未正式拍拖，不過已經會兩個人約出街睇戲食飯，照計好快成事。
都話睇波不賭波，樂趣更加多啦，齋睇唔賭可以享受work from home，又可以去老細屋企飲飲食食，有人仲溝到女添，希望爛賭同事都嗱嗱聲搞掂啲數啦，賭咩吖，睇下波咪幾過癮！