搵工同做人一樣,其實好講際遇

收到個WhatsApp,係我一個求職者話佢終於搵到工作,我聽完都好開心,因為佢嘅壓力真係好大。

呢位求職者大約一個月之前嚟見我,當時佢已經失業咗接近兩個月,但你知道有時send 50份CV出去,可能真係得一兩個回音,而佢屋企人又唔理解,淨係每日都鬧佢唔搵嘢做,其實唔係唔搵,係連見工嘅機會都冇。

佢上嚟我公司嘅時候講到唔捨得走,因為佢每日都扮緊返工,8點幾出門,6點幾先敢返屋企,好可惜當時介紹畀佢嘅工作見唔成,望住呢個後生女咁迷惘,一時三刻都唔知可以點幫。

社會上好多人都冇後路,亦唔係每一個人都可以咁好彩當屋企係避風港,遇到挫敗同埋失意嘅時候,家人畀佢哋嘅壓力往往大過街外人,我做headhunt呢幾年,見過好多人身後冇倚靠,前路又白茫茫一片,好容易就迷失方向。

而家知道佢搵到嘢做,唔使再日日出街扮返工就好喇。

如果你身邊有人失業,希望你會支持佢,鼓勵佢,搵工同做人一樣,其實好講際遇,唔係付出幾多一定收穫幾多,不過呢個世界真係有「大數定律」,keep住唔放棄繼續搵,一定會搵得到。

error: