雖然我身在英國，不過有同事今日last day，所以都要WhatsApp同佢講聲一路順風。
佢條team出晒名惡做，因為個阿姐真係好刻薄，半年已經鬧走7個人，另外又係咁畀說話一個大肚嘅同事聽，迫到對方意興闌珊走人，基本上全公司都唔鍾意佢阿姐，包括HR，因為搞到佢哋工作量大增，啲人請完又請，淨係招呼呢個阿姐條team都花咗好多時間。
我同事今日要提早兩個鐘過去head office放低職員證，另外要簽返啲文件，HR拎咗張form出嚟請佢填，內容大約係「呢段日子做得開唔開心？」同埋「有冇咩意見可以幫助公司繼續改善同進步？」HR誓神劈願會保密，得老細一個睇到，不過我同事最後都係冇寫低隻字片語。
其他同事問佢點解臨走唔爆大鑊，係咪唔信會保密？驚第日reference check會畀個阿姐bad mouth？佢話呢個只係其中一個原因，最重要係睇清楚一個人唔需要去揭穿，討厭一個人唔需要去反面。
我十分佩服呢位同事嘅大智慧，佢同我私人分享呢件事嗰陣，仲講咗另外一個觀點，就係當你好厭惡一啲人或者一個環境，唔使花時間同佢哋嘈，亦唔使花心思去諗點樣報復，最重要係自己勤力啲，努力去搵更好嘅出路，離開呢啲厭惡嘅人同埋地方，咁佢哋亦永遠喺你生命中消失。
100％同意！