睇到蘋果日報嘅外賣員專題，令我諗起以前見過隔離office有人因為外賣嚟遲咗，兜口兜面指住個外賣哥哥仔嚟鬧。
我記低當日係黃雨，正當我步出公司撳電梯去食lunch嘅時候，見到隔離office有個男人企喺佢自己公司門口，不斷鬧個外賣員遲咗10分鐘先送到，當中夾雜好多粗口，而且聲浪愈嚟愈大，搞到我公司其他同事都走出嚟睇發生咩事。
我眼見個全身濕晒嘅外賣哥哥仔完全冇駁嘴，keep住好誠懇咁講對唔住，又解釋因為好大雨先至會遲，仲要雙手捧起袋外賣等對方接收，但係個男人反而氣燄更盛，直情指住外賣員個鼻嚟問候人哋阿媽，鬧嚟鬧去都係lunch time得返好少時間食唔切之類。
我忍唔住過去同個男人講：「你使唔使咁樣鬧人呀？出面咁大雨，人哋都係打份工啫，互相體諒下啦！」不過個男人完全無視我，後來我公司另一個女同事都睇唔過眼，走嚟叫個男人唔好太過份，終於條友冇再鬧，但又叉住條腰企喺度唔知想點，我遞咗張100蚊出嚟話買咗佢個飯盒，我可以要咗佢，就咁算啦！
呀屌，個男人又唔收我錢，跟住好唔忿氣咁接咗個飯盒，粒聲唔出行返入office。（我有一刻懷疑我係死咗，點解佢完全無視我又好似聽唔到我講嘢。）
服務業雖然應該為客人提供最好嘅服務，劉華植入畀廣大市民嘅意識係「今時今日咁嘅服務態度係唔夠」吖嘛，只係有好嘅服務唔等於要冇底線，我隔離公司個男人可以選擇投訴或者退錢，但係指住外賣員個鼻問候人阿媽就真係過晒火。
我見蘋果日報呢則專題嘅留言當中，有唔少人話外賣員賺咁多，食得鹹魚抵得渴，與其同情佢哋，不如同情自己份工賺得少過佢哋。我想講個重點錯咗，外賣員唔係需要同情，而係需要尊重，職業無分貴賤，每個打工仔都值得被善待，賺多賺少又點？都係靠自己勞力啫！
同一架電梯一齊落樓嘅時候，外賣哥哥仔一直同我講唔該，我都分唔清佢面上係雨水定係眼淚，我只係知道香港地每個人搵食都唔容易。