同事：「我下星期一晏晝請半日病假，同你講定先。」
阿Ray：「得啦！你星期五再提我。」
阿Ray係我哋部門嘅Manager，提早咁多請定病假都批，係咪好神奇？
我哋公司傳執笠同裁員已經一段日子，雖然只聞樓梯聲，但同時都聞到燶味，呢兩年有人走就當係自然流失，唔會再請返，人工亦好耐冇加喇，咩雙糧bonus直頭諗都唔好諗，總之成個office嘅氣氛都幾頹。
不過阿Ray好開通，佢承認自己都有出去搵工，亦鼓勵同事趁仲有份工吊命就邊做邊搵，阿Ray話，之前有同事請假去interview，以「屋企有事」作為原因，返嚟之後好快就遞辭職信喇！
阿Ray：「見工好閒啫，唔使下下講屋企有事，唔老嚟㗎！你哋要interview直接話我知啦！」
佢唔係吹水，阿Ray試過幫同事做Role play exercises，新年前先聽到佢咁樣教同事：
「唔好話驚裁員，咁樣人哋聽落咪會覺得，點解人人唔裁淨係裁你囉！唔好畀位人哋入吖嘛！」
今日輪到我要請假：「阿Ray，想同你請定聽日病假，有工見。」
阿Ray：「使唔使同你role play下？」
我：「唔使啦，Zoom interview啫，應付到。」
阿Ray：「Zoom使鬼請假咩，幾點呀？畀間會議室你用咪得囉！」🤣🤣開通到咁！
我：「屋企自在啲吖嘛！」
阿Ray：「咁又係，你鍾意啦，聽日晏晝呀？OK！」
雖然間公司冇前途，但個Manager又真係幾好，希望阿Ray同其他同事都會搵到好工，轉唔轉係一回事，最緊要大家有得揀吖嘛！