搵到新工遞信辭職，畀上司嗌入房傾咗半個鐘，雖然好高興佢會挽留我，但冇啲實際行動例如加人工之類，我真係冇誘因留低，而且新公司大過呢度，份糧又多咗20%，resign前已經深思熟慮，仲有好多原因嘅，一句講晒，我去意已決。
「Tony，同你講一單好恐怖嘅嘢，幾年前有個同事又係好似你咁，搵到份新工之後resign，咁我咪放佢走囉，冇理由阻人發達㗎嘛……」
我：「係，然後呢？」
「冇幾耐之後佢過咗身！」
我：「下……咩事呀？」
「交通意外，佢轉咗新工之後冇耐就出事，仲要喺佢間新公司附近，所以我希望你返去考慮清楚，封辭職信我當冇收過。」
想點L樣呀？係咪好似細細個啲大人嚇小朋友咁，你百厭就會畀摩囉差捉咗去～～～所以我為咗避免交通意外都唔好轉工？
我：「唔使喇，我已經考慮得好清楚，同埋意外呢啲嘢預計唔到，我同新公司簽咗contract，點都好，多謝你留我。」
後來我同其他同事講，順便打探係咪有人辭職後交通意外死咗，其中一位同事話佢聽到嘅版本唔係咁：
「有次我食lunch去咗銀行搞私人嘢，晏咗半個鐘，即係2:30先返到office，阿頭無啦啦走嚟搭住我膊頭，話以前有個同事食晏遲咗返，過馬路畀車撞到，我都唔知佢講呢啲做咩？一係佢就直接叫我食lunch準時返啦！」
唔怪得啦，食晏遲咗返就畀車撞，辭職轉工就交通意外死埋……好心就正正經經講嘢啦，做咩要詛咒舊同事有車禍呀？就當真係咁邪，都冇理由喺呢啲場合用嚟做例子啦！