我係體育記者，之前東京奧運有份去採訪，比賽場內嘅事我報道咗好多，但係場外發生嘅事就需要渠道宣洩。
唔知大家有冇一啲朋友，每次知道你出trip或者去旅行就會叫你幫手買嘢？可能我唔好彩啦，身邊總有一個咁樣嘅人，以前嘅唔好提，今次東京奧運嗰個就真係有啲嬲。
條友知我去東京做嘢，直頭畀咗個list我，一份列晒有咩要買嘅清單……其實我哋記者身份都唔可以周圍走，一來日本政府喺疫情下有監管，二來我哋係嚟做嘢唔係shopping呀大佬！再睇下佢張清單，入面啲嘢大部分香港都有得買，例如嗰啲乜柒嘢鎮痛貼，香港Donki成個貨架都係啦！另外有啲就算香港市面冇得買，其實都有代購㗎！好似件奧運Tee咁，冇錯，你搵代購一定mark up咗幾廿蚊，不過呢啲錢你畀人賺啦！
同你計下條數，你搵代購係買貴咗幾廿蚊，但你搵我幫你買，最後咪一樣要約出嚟交收，搭車又要錢，出得嚟點都會飲杯嘢甚至食餐飯，條數加埋仲貴過你搵代購，另外，時間都係cost嚟㗎！
睇完佢張list，我堅決唔幫佢買，一係你自己去Donki，一係搵代購，因為呢條友已經有前科，曾經出trip採訪幫佢買嘢買到半個行李箱都係裝貨，自己啲衫褲鞋襪差啲擺唔落，阿媽生我出嚟係為咗幫你掃貨買手信咩？我冇生命㗎？我自己唔使買嘢呀？
今次東京奧運拒絕幫佢買嘢，呢個friend竟然怕蝕底到叫我喺機場買Tokyo Banana，我想講呢，Tokyo Banana上網都買到㗎喇，直送香港，唔好咩都怕執輸，係要叫人幫你買嘢先安樂啦！旅行又好，出trip又好，返到香港都會攰，仲要約你出嚟交收手信真心煩。
最好笑係我準備回程返香港前一晚，佢叫我第二朝去神社買幾個御守返嚟，你係咪人嚟㗎！即係上機前仲要幫你仆出去神社呀？
呢條友唔止煩我㗎，圍內有另一個friend之前移居倫敦，佢最近走去叫人幫手掃曼聯波衫，點解要掃？因為C朗再加盟曼聯，香港周圍都搶緊件波衫，所以佢就叫個倫敦friend掃一大批，話想拎返嚟炒喎！唔該啦！外國唔係香港，唔係行落街就有間波衫舖咁方便，人哋點解要同你特登出去搶曼聯波衫呀？
講起炒賣，呢個仆街friend喺奧運期間仲「吩咐」我做一樣嘢，就係幫佢抽Nike波鞋，須知道呢個動作係要用香港電話登記，再收一個sms嘅code先可以完成，我話自己喺東京，換咗張漫遊sim卡收唔到code，佢好意思咁講：「唔緊要啦，你而家換返張香港sim 卡，然後開漫遊，收完個code再登記抽波鞋，跟住再換返張漫遊卡囉！」先唔計當時做緊採訪忙到仆街，你為咗抽波鞋叫人喺外地換卡登記？冇病呀？
點解世界上會有咁樣嘅人㗎？咩都怕蝕底，以麻煩人為樂，唔好話出trip係工作啦，就算對方係去旅行，你都唔應該要人哋犧牲旅行嘅時間幫你買貨買手信，呢種行為好自私呀！同埋計下數啦唔該，好多嘢香港都買到，或者已經有代購，要人山長水遠喺外國同你買，返到嚟仲要就時間約見面，條數唔係喺返度咁簡單，我仲幾肯定大家都倒蝕，何必呢？
我都試過同阿哥去旅行，期間阿哥拎住佢一個同事嘅「清單」周圍去買嘢，嗰次佢為咗幫同事買手信定唔知買藥，明明唔順路都搭車去某一區，嚴重影響我哋原本旅行plan好嘅行程，之後仲塞爆行李箱搞到超重，諗返起都嬲。
投稿讀者：小體記