每個人都有跌錢嘅慘痛經驗，無論係拎咗去賭波賭馬、投資股票基金、唔小心買咗貴嘢、畀人呃……等等，總之咩形式都好，人生在世，有邊個未試過跌錢吖，最近幾位同事就傾起呢個話題，事緣有人幫老細買$10六合彩，自己就跌咗$290……
「月尾要勒緊褲頭，8月淨返幾日唔出去食lunch喇，幫手買六合彩自己唔見幾嚿水，妖！」
「佢唔畀返錢你？買幾多？」
「佢買$10蚊啫，不過話自己冇account，又冇時間去馬會排隊，佢知我有戶口咪走嚟搵我買囉，仲即刻畀返$10蚊我。」
「咁有咩問題？」
「問題係馬會網上存款最少要轉帳$300，之前我歐國盃輸到仆街已經斬手指戒賭，佢突然叫我買注六合彩，冇得推就唯有網上轉帳入馬會戶口幫佢買囉，咁最少要入$300吖嘛，買完六合彩有$290淨就手痕買波，結果輸鳩晒，妖！好撚嬲呀！我本身冇諗過買波，入咗錢落戶口又身痕，我以後唔會再幫佢買六合彩，馬會又係狗，最少要人入$300，搏你賭埋佢。」
然後另一位同事就話：「兩嚿幾水啫，我跟個friend買咗隻股票，而家跌到阿媽都唔認得，帳面蒸發咗20萬，20萬呀！話就話一日未放都唔叫蝕，但我知道升唔返買入位㗎喇，可以用嚟做牆紙或者留畀個孫。」
一講起跌錢經歷，office突然熱鬧起上嚟，買波輸股票多少同賭博心態有關，但有啲同事跌錢嘅方式就比較「被動」，例如正價買完一樣嘢，第二日就見到間舖頭大減價；部iPhone畀隻貓推落地下爆mon，拎去整用咗二千幾；將架車泊街然後畀人撞笠咗，搵唔到「兇手」，又要去幫襯車房；個仔拎咗啲攝影器材出嚟當玩具玩，整爛咗一個五位數嘅鏡頭……
突然有個一直冇出聲同事話：「係咪要鬥慘呀？兩年前同個friend租咗間舖搞餐廳，簽完約冇幾耐爆疫情，我哋最初投資咗六位數，淨係部全自動咖啡機都$98000，跟住開始禁晚市，冇生意，但又唔可以冇員工，開門就蝕人工蝕燈油火蠟，唔開門一樣等死，上個月我計過數，累積蝕過百粒，近排終於完租約，好似發咗場夢咁。」
我哋聽完全部嘩嘩聲，因為大家一直都唔知道佢秘密搞自己生意，呢位同事本來想等餐廳上軌道就辭職，最後呢個如意算盤打唔響，由於銀碼太大，其他人嘅跌錢經驗頓時變得小巫見大巫。
呢位蝕過百粒嘅同事話對比起我哋，佢覺得自己好慘，唔知幾時先至賺得返，仲叫我投稿問下其他人有咩跌錢經歷，佢話想聽下人哋嘅故事，平衡下心態喎，不過一般人應該好難超越佢㗎喇。
其實我都有㗎，借錢畀個friend一去無回頭，連朋友都冇得做，不過銀碼都係講緊萬幾蚊，邊有得同佢比吖，希望喺你個page唔會見到有人慘過我同事啦！
投稿讀者：Eve