我係一位Pre-wedding攝影師，收開$12,000，服務內容包括10個鐘嘅shooting、12×18寸相簿 x 1、20×30寸油畫 x 1、全部相包basic retouch、另外35張相包further retouch，同時包埋化妝、Set頭，仲有一個燈光師，如果影到超時係唔使加錢，呢個價係貴定係平就見仁見智，總之價啱就做，唔啱就唔做，我從來唔會坐地起價，收費全部透明冇隱藏，但亦都唔會減價，就係咁簡單。
上年我收到個enquiry，對方係用WhatsApp聯絡我。
「你好，朋友介紹我哋搵你影Pre-wedding㗎！」
我：「你好！」
「可唔可以收平啲？」
我：「唔好意思，唔講價。」
「我女友話太貴，平啲啦！」
我：「實價，抱歉。」
「3000蚊得唔得？」
我：「$3000? 我收開$12,000喎！」
「但係我女友話出面有幾千蚊。」
我：「先生，咁你不如搵出面幾千蚊嗰啲啦好冇？唔好嘥大家時間。」跟住佢就冇再回覆。
第二日我有Pre-wedding job，等新娘補妝期間睇一睇電話，呢位先生又send咗一大揪msg過嚟，好似失憶咁再重頭講一次$12,000太貴，$3,000得唔得，跟住埋怨我冇禮貌唔覆佢，真係痴線，冇接你job都要話我覆得慢，你唔係我個客嚟㗎，如果接咗你job仲得了？
夜晚影完相先一次過reply，我直接講多次：「唔好再講價喇，再討論落去冇意思。」當時係8pm左右，佢冇再send msg嚟，我以為告一段落，點知第三日又再loop一次。
「$4,500可唔可以？我女友好想搵你影。」
我：「No.」打多隻字都嫌廢事。
「$5,000 ok？我哋可以自己化妝。」
我：「拒絕咗你㗎喇，唔好再send msg嚟。」本身想block柒埋佢，不過第四日同第五日都冇再收到佢msg，再過埋weekend，我又天真地以為件事完咗，點知……
「Hi，我女朋友喺出面搵咗幾間Pre-wedding，發覺你哋呢行啲價好海鮮，有啲幾萬，有啲幾千，但佢最鍾意你影嘅相，我哋加到$8,000 ok？」
我：「講咗唔得，唔好要我重複又重複答你，我好忙㗎！」
「okok，$12,000，不過幫幫手，我會畀$12,000你，你張單開$3,000得唔得？我廢事畀女友鬧，佢知道貴咗一定鬧我，你照收$12,000，張單開$3,000吖。」
我：「我唔做呢啲嘢，係咁。」
再過多一日。
「Hi，$12,000冇問題，女友諗過一生人一次，都係想影得靚啲，想問一次過畀晒$12,000定分期？要落訂？想10月頭影。」
我：「我唔接你生意。」
「$12,000喎，照返你原價，唔係講價。」
我：「話之你$12,000定係10萬，我唔接。」
「點解呢？」
我：「接唔接job我決定，冇點解？」
可能你會問我做咩唔block佢，但我始終係打開門做生意，寧願有問有答，理據永遠喺我呢邊，一陣撞著啲傻人直接cap圖post出去唱我就好煩，畢竟我在明佢在暗。
足足半年，我冇再收到呢位先生嘅msg，點知兩個星期前佢又再WhatsApp我。「Hi，我呀，後來同女友搵咗另一個攝影師，不過影得好差，而家想搵返你影。」
我：「未來一年都冇期。」
「點解你咁嘅態度呢，因為影相呢件事，我同女友已經鬧咗好多次交，咁而家啲相影唔好，佢叫我搵返你。」
我：「哦，唔接。」
「點解唔接呢？」
我：「半年前答過你，冇點解。」
「你聽埋先，因為之前搵咗另一個，所以用咗啲錢，可以的話畀個7折我ok？時間可以縮短啲。」
我：「唔好話7折啦，原價，十倍價錢都唔接。」
「你都幾蠻不講理。」
我：「是但啦，祝你哋白頭到老，係咁。」
雖然之後冇再收到佢message，不過我都幾肯定佢仲未煩完我，好多人問我點解唔嬲，點會冇嬲呀？初初$12,000劈價$3000一定嬲啦，只係久而久之我當佢傻X咁睇，最近呢次佢話搵另一個影完唔滿意，我直頭一路睇一路笑，希望呢對情侶嗱嗱聲結婚啦，好明顯兩個都係人間極品，記得白頭到老呀，是但放生邊個出嚟害人都唔好。
講價嘅客人見得多，癲到咁就真係第一次遇到，希望亦係最後一次遇到。
投稿讀者：Harry