有個中學同學3年冇做嘢，屋企叫做小康之家，未去到富二代，但可以唔使畀家用，間唔中仲可以問阿媽攞錢，咁已經爭好遠㗎喇。
我哋圍內幾個相熟嘅舊同學其實有不斷彈啲工畀佢，特別係我做headhunt嘅時候，差唔多兩星期msg佢一次：「喂，有份CS唔錯，唔使經驗，先上兩個星期training，就算之後唔做，呢兩個星期training都照計人工，有七千幾㗎，你轉正就萬幾，做住先啦，呢間公司唔介意你成年冇做嘢……」
都未講完，佢已經一句ban埋嚟：「CS咁受氣，香港人又鍾意投訴，唔使預我！」
當然啦，我唔止介紹過一份工畀佢，但呢位舊同學係見都唔去見，某次有份文職佢表現得好有興趣，然後叫佢send份CV嚟，成個月都未send，追佢，又話今晚整，佢個「今晚」＝ 「一個月」，最後不了了之。
另外幾位中學同學勁啲，介紹畀佢啲工直情見都唔使見，拍膊頭就得，識人好過識字就係咁解，只要嗰位量地三年嘅同學say yes，有帶身份證去，而去到又唔係無啦啦發羊吊或者爆粗鬧人，有手有腳有呼吸就請㗎喇，因為份工嘅來源係中學同學啲friend，甚至係佢哋自己開嘅公司，完完全全係打友情牌。
講咁多都冇用，失業同學唔領情不特止，仲次次都批評到啲工體無完膚，問心幾位中學同學介紹嘅幾份工唔算太差，文職又有，門市工又有，起碼唔係叫佢去擔泥或者做鴨。
唔係擔心佢冇錢，係擔心佢一直懶落去會同社會脫節，會適應唔返個節奏同埋步伐，不過佢總係講到自己胸懷大志，要搞生意要呢樣嗰樣，好多諗頭，又從來唔實踐，有次佢話要幫我出書，我問：「你做過印刷咩？你識排版咩？有相熟發行咩？」佢答我：「唔識呀，學囉，有幾難啫！請個part time幫手都搞掂啦！」🤷🏻♂️
其實另外幾位中學同學而家都發展得唔錯喇，我哋幾個都有捱嘅時候，經歷過放下身段嘅日子，當你拋開呢啲心理枷鎖去工作賺錢，證明你已經懂事，知道生活中嘅柴米油鹽醬醋茶係不可或缺，有啲現實始終要面對，辦公室日報個月曆都印過~~~有時要做一件鍾意嘅事，首先要做一啲唔鍾意嘅事。
呢啲係過程，冇可能一步就做到CEO。
讀中學時喺屋企附近酒樓做兼職侍應，嗰陣我已經學識放下身段，放下面子，因為經常會遇到住附近嘅同學仔成家嚟食晚飯，你估我唔怕瘀咩？你估間酒樓嘅職工頭圍用膳好食咩？同豬餿冇乜分別。晚晚做完兼職返屋企都散晒，大時大節見到人哋成家嚟食飯，我仲會好羨慕。
不過當有一日你可以用面子嚟賺返錢嘅時候，即係你已經有少少成功，唔多，可能真係少少，唔一定要做名人，例如我識得啲人做sales，有啲客唔係畀面你公司，係畀面你，你轉去邊間公司都一樣，個客係信你，個客係buy你。但若然你仲係停留喺吹水唔抺嘴，講就天下無敵，做就有心無力嘅階段，Retail工又話唔想拋頭露面驚冇face，辛苦又嫌辛苦，hea工又嫌冇前途，人哋有工返你又睇唔起，人哋冇工返你又笑鳩人，咁可能已經代表咗，你呢世都只係得咁多，鴻圖大計流於紙上談兵，你統治嘅只有自己幻想出嚟嘅地球。