今朝返工撞到以前女朋友，其實我哋公司喺同一區，撞到絕對唔出奇，反而咁耐以嚟先撞得一次，似乎反映咗我哋根本無緣。
佢可以買個二萬幾蚊嘅名牌手袋唔手軟，我走去買件Pull & Bear牛仔外套佢覺得貴，好記得都係399啫，連佢個手袋嘅尾數都唔到。唔緊要，男女大不同，但係點解每次著親件牛仔外套都要哦一大輪呢？係咪要我買bossini先安樂？
佢話要食私房菜，成千蚊一位，冇問題，但點解我幾廿蚊join個Spotify同Netfix佢又覺得唔值呢？好記得佢話用YouTube都聽到歌，喂小姐，YouTube要一直著住機好柒㗎，熄mon就停音樂㗎喇。
其實大家性格同埋價值觀唔同，唔一定要分手收場，大把情侶或者夫妻都可以南轅北轍，下下一模一樣亦唔一定係好事，否則點會有個講法係一個凹一個凸剛剛好，所以關鍵詞其實係－－－尊重。
佢做秘書，我做Dating Consultant，冇問題㗎。
佢做秘書，日日話自己份Com Sec幾威幾勁，人工點好，然後話我份Dating Consultant唔知係咩工，唔知點同人講，呢個就係問題。
旅行佢鍾意去歐洲，我鍾意去日本泰國，冇問題㗎。
佢鍾意去法國睇巴黎鐵塔，然後話東京鐵塔唔知睇嚟做咩，佢鍾意去大英搏物館，然後話台場TeamLab好流，兩樣都唔同，點比較呢？呢個就係問題。
佢鍾意行街，唔鍾意喺屋企，我鍾意打機，冇問題㗎。
佢話出去行下可以睇多啲新嘢，可以見多啲人，留喺屋企打機好無聊，好似廢青，呢個就係問題。
一對情侶係咪完全100%夾，生活習慣係咪100%一樣，價值觀係咪100%相似，工作同埋收入係咪100%匹配，其實通通都唔係最重要，兩個人一齊，「尊重」，先至係長久嘅關鍵詞。