「想問下你哋同另一半會唔會冇嘢講？我同男朋友成日dead air，大家係咪淡咗呢？定係正常？」
其中一位女同事提出呢條問題，然後其他同事嘅答案都唔一樣，有人表示同老公依然有數之不盡嘅話題，有人就話同男朋友都唔係分分鐘講住嘢，有陣時會dead air冇嘢講，不過從來冇諗過淡，或者分開等等嘅問題。
女同事問：「你呢？你同女朋友多唔多話題？」
「其實我冇好在意呀，我諗我哋都會冇嘢講，但好似唔係咩大問題喎。」
其實愛情有好多種唔同方式，你可以每日同佢傾好耐電話，以解你對佢嘅思念，不過羅志祥都同前女友晚晚傾到凌晨，咁又點呢？咪一樣偷食。兩個人一齊，熱情總有減褪嘅一日，但唔等於愛會消失，佢只係以另一種方式呈現。
就算我同你冇嘢講，以後嘅日子都係想同你過。
你對住另一半，會有呢種諗法嗎？
有冇聽過《我想和你無所事事》呢首歌？好多年前㗎喇，後來有好多人用呢個名開cafe，開甜品店。
你同另一半生活，可唔可以一個打「動森」，另一個做其他嘢，冇傾計，不過互相對視嘅時候仍然覺得好幸福？
冇嘢講，你都可以選擇陪伴，而且有冇嘢講，你其實可以選擇。
聽過有情侶嘅溝通方式係：
「你食咗嘢未？」
「食咗。」
「收工未呀？」
「未？」
「今個星期日去邊呀？」
「是但啦！」
同一組問題，我亦聽過另一對情侶係咁樣交流：
「你食咗嘢未？」
「食咗啦，樓下間超記，常餐都煮唔掂。」
「吓，常餐都唔掂？淥個麵咋喎！」
「個麵冇嘢呀，隻雞翼唔熟，仲要好似營養不良咁，我隻手指公大過佢隻雞翼。」
「係咪單骨雞翼咋？」
「痴線，梗係唔係啦……」
「收工未呀？」
「唉，未啦？個仆街老細又係就放工先塞嘢我做。」
「走囉，唔使理佢。」
「走鬼走馬咩，聽日咪又係我做，你收工未？」
「收咗啦，約咗阿欣佢哋食飯。」
「又係阿欣條八婆，咁你食完打畀我吖，睇下我到時走未？」
「你做乜叫人八婆啫！」
後者對話內容無聊嗎？其實中間夾雜咁多文字，最終都係表達「食咗」同「未收工」，你甚至可以視之為廢話，不過用邊種方式相處同表達，其實真係有得揀。
我屋企樓下個公園有對公公婆婆成日拖手散步，佢哋都好少講嘢，有時只係一個靜靜地坐，一個喺度郁下鬆弛筋骨，但佢哋確實風雨不改，一齊過日子，一齊白頭，一齊行人生路。