新年前最後一個working day，做做下嘢私人手提電話響，我真係好驚喜呀，對方同我講：「係咪Mark呀？我係XXX Iris呀！記唔記得我？」佢算醒，識得話係XXX Iris，XXX係我之前間公司嘅名，你連埋一齊講我就有印象喇，否則點會記得舊公司個HR。
我：「咩事？」因為係新年呢啲時間，我以為佢咁好死打嚟拜個早年，不過又奇怪吖，大家基本上冇交情又唔friend，呢條女仲要結咗婚，我同佢之間應該冇咩好講，正所謂無事不登三寶殿，斷估佢唔係轉咗行做傳銷或者保險啩！
Iris：「有個Survey想搵你幫手呀？」
我：「咩嚟？」
Iris：「離職調查，想問返你幾條問題，關於嗰陣時離職嘅事，3條㗎啫，嘥你幾分鐘時間，好快！」
我：「乜嘢呀？我2022年3月走㗎喎，而家2023年喎，做咩調查呀？你係咪打錯電話搵錯人呀？」
Iris：「唔係呀，真係搵你，公司新嚟咗個GM，佢一定要搵返2022年所有離職員工做Survey，仲話我哋之前冇咁樣做係唔啱，而家要全部補返晒，公司上年走咗廿幾人，我要逐個逐個call返呀！」
我：「咁變態？我唔得閒喎，做緊嘢。」
Iris：「幫幫手啦，好大壓力呀，呢幾日要交喇，個GM係咁話我哋人事部唔掂，你唔幫我真係畀人炒㗎！」
我：「是但啦，快啦！返緊工㗎！」
Iris：「唔該晒，好快，第一條係點解要辭職，即係你上年點解要辭職。」
我：「公司戇鳩囉！做唔到嘢嘅人又升職又加人工，做到嘢嗰啲就要做埋人哋嗰份。」
Iris：「Sorry，可唔可以冇粗口呀？我寫唔到落去呀！」
我：「咁唔止公司戇鳩喎，原來你都戇鳩，冇人叫你寫埋個粗口落去㗎嘛，你咪寫公司唔公平囉，唔係要我教埋你中文寫作呀？」
Iris：「唔係呀，可唔可以唔好踩得咁盡呀，即係唔好一面倒批評公司，個GM唔鍾意呀！」
我：「嘩！你都幾惡喎，打嚟叫我做咩離職調查，過咗咁耐我肯理你已經好好，而家仲要唔畀講真話？」
Iris：「唔係咁嘅意思，即係有冇啲唔好踩得咁盡嘅說話，可唔可以講得中庸啲，唔好咁激，因為到時新GM又問返我公司之前係咪咁，呢度又有排解釋，一陣又要開會。」
我：「得啦咁，你幫我作文咪得囉，你鍾意點作就點作啦下，冇所謂，作到見得人，作到好聽啲，自便。」
Iris：「好，另一條係想問，你覺得同同事相處愉唔愉快？覺得公司氣氛點樣？」
我：「你覺得愉唔愉快吖？好愉快咁點解要走？轉工好L好玩係咪呀？即係我屎忽痕喇，想轉下工，想生活有啲調劑，係咪咁樣？」
Iris：「如果你話同同事相處唔開心，個GM又要開名，又要問到篤係咩事……」
我：「其實你咁樣問冇意思喎，又要問，又唔畀講真話，我唔知你打嚟做乜，係咁啦，唔得閒招呼你！」
痴線！嘥我時間，你呢個咩Survey本身已經好多餘，騷擾個離職咗接近一年嘅員工，然後又唔畀照直講，咁你打畀我托柒呀？自己作晒啲答案咪得囉，求其話公司好好呀，好正呀，忍痛離開呀，好後悔呀，喊住走呀……
淨係講今次呢件事，我已經覺得當初辭職真係好正確，呢間舊公司係完全冇進步過，我唔知個新GM係咩人，或者佢叫HR做離職調查嘅出發點係好，不過call返舊員工問呢問路又係咩玩法？然後HR又要作到靚一靚先遞上去，咁個調查嘅意義都變晒質啦！
過多陣陸續有幾位舊同事WhatsApp我，原來佢哋都收到Iris電話。
「低B，頭先Iris打嚟問我當時做咩resign，我話你哋冇福利囉，然後Iris問我可唔可以講過另一啲原因，佢係咪傻㗎！」
我：「我都收到佢電話呀，答咗兩條即刻cut佢線，浪費人生！」
「但係佢第三條仲爆喎，問我將來會唔會考慮返去做，我話去考保安牌做實Q都唔返，Iris問我可唔可以答『會考慮返去做』喎！咩料呀？」
後來再同另一位舊同事傾多兩句先至知，Iris話就算幫我哋作答案，都要得到我哋呢班舊同事答應，要夾口供，因為新GM講明會抽查，隨時親自打嚟問，以防人事部冇打電話然後自己作文……
呢個新GM疑心都幾重，不過佢係打嚟就好呀，我一定會如實講晒舊公司啲衰嘢畀佢聽，到時佢哋要檢討又好，要開會又好，總之唔關我事，瀨低pat蘇州屎我就唔理㗎喇！咪畀我睇死吖，新年假過後office就最得閒，到時個新GM隨時打嚟，睇下會唔會收到call先。