上一代對工作嘅熱誠我係尊重嘅，但係咪要做到好似隻牛咁先至叫叻，又或者係咪要聽聽話話唔say no先至叫乖呢？呢樣我就不敢苟同，始終時代唔同咗，無論係生活、工作、待人接物，甚至係溝通嘅方式已經有好大轉變，有時要到達一個地方，達到一個目的，唔係只得一條路嘅。
初初入嚟呢間公司嘅時候，上司係非常憎我，正確嚟講係直至而家都好憎我，簡直視我為眼中釘，記得佢曾經咁樣講：「請你因為你係一張白紙，諗住聽教聽話，點知你就成日走精面，你係咪覺得自己係性格小生呀？」真係唔好意思，原來我冇相關經驗會令上司產生錯覺，以為我入咗嚟就會不問原因事事遵從。
其實我唔係玩嘢或者叛逆，只係佢教嗰套真係過時，我哋最大嘅磨擦就係見客嗰part，因為要追kpi，每日都要交個client visit嘅list，所以上司不斷催迫同事去見客，但係有好多客會直接同我講：「張單我confirm咗啦，唔使上嚟㗎喇，我好多嘢做唔得閒應酬你㗎！」
我：「唔係呀，我老頂迫我client visit呀！」
客：「咁你咪出去食飯睇戲扮見咗客囉，呢啲嘢唔使我教返你轉頭呀？」
我：「唔係哩，老頂要啲客吸公司印，證明我有去過呀……」
客：「即係小學生去旅行簽回條咁呀？」
我：「係呀，佢話驚啲Sales偷懶，整咗張client visit嘅form，去人哋office要吸個印返嚟證明真係有上去。」
客：「你阿頭都痴孖根！單我就落咗喇，總之唔使上嚟見我，直頭冇房招呼你呀，你鍾意就問reception姐姐吸個公司印啦，最多我同佢講定，不過吸完好走喇！」
你話係咪擾民？Client visit要個客吸印喺張form度，唔止似小學生旅行回條，仲話埋畀人知你唔信個下屬，而且公司印唔係人人肯吸㗎！換轉我係個客，點知你要個印有咩企圖呀？人哋都要保障自己，更何況個客幫你買嘢，仲要另外抽時間應酬你？咪咁老土啦！
我部門班同事全部有同感，不過冇人敢出聲，得我會駁嘴同埋提出質疑，所以上司就視我為眼中釘，覺得我唔聽話，練精學懶，藉口多多唔想見客，其實我根本冇心同佢作對，只不過為件事好啫，唔使下下玩針對喎！
當時做到冇癮已經諗住遞辭職信，自己又想讀返個Master呢，最擔心係學費，諗起要搵兼職就頭痕，點知上司呢個時候將我調去Sales Support嘅部門，呢個department美其名係做下admin同埋backup嘅工作，實質就係「庶務部」，仲講到明係將我投閒置散。
上司：「我唔識教你喇，既然叫你見客咁多唔滿意，你去Support條Team啦，做啲下欄嘢唔使出街，你開心啦！」
嬲嬲地真係想將一早打定嘅遞辭信拎出嚟，不過諗諗下遞信都唔想遞畀佢，寧願過到去之後畀Support Team嘅主管。
喺上司嘅角度，佢覺得咁樣係懲罰緊我，因為「庶務部」冇嘢學又冇得見人，加上只可以食底薪，唔使跟客自然冇佣金。的而且確，最初我都係咁諗，點知轉Team之後先發現係天堂，呢個部門勝在人多，分完工之後workload近乎零咁滯。
咁呢條Team啲同事平日做咩呢？有人讀日文，話要考N2喎；另外有個女仔喺度整cushion，佢有個手作仔IG store；有人煲劇，有人睇小說，有人秘撈，點解咁過份而主管完全唔理？因為讀緊日文準備考N2嗰個咪就係主管囉！
跟住點？梗係撕咗封辭職信當冇打過啦！本身想resign走去讀Master，煩緊搵兼職，而家冇嘢做又有糧出，感覺就好似攞咗獎學金一樣，呢條Team啲同事仲好似有共識一齊做冗員，非常團結，上下一心冇人搞搞震。
之前個上司仲以為將我投閒置散，自此就會令我意志消沉，傻啦！Office已經變咗我嘅自修室，爽呀！其實我都唔慣咁得閒，不過未讀完書，之後upgrade咗個education background先慢慢搵新工都未遲，到時我派散水餅一定會預埋之前嗰位上司。