離職率高到連HR都不斷轉

😂😂😂500蚊稿費好少咩?你知唔知我寫專欄都係逐隻字計,我要係咁重複又重複先呃到下字數咋,搵食艱難呀😭

==========

投稿人:阿窩

早排我去見工,由一位叫Priscilla嘅HR負責interview,佢超級好人,過程亦都相當愉快,我諗大約過咗兩星期,終於收到電話叫我返工喇:「你到時上嚟搵Joey吖,記得拎埋銀行卡,要影印for出糧。」

由於我要一個月通知,所以亦都係一個月後先履新。

去到新公司之後,我同接待姐姐講搵人事部Joey,對方話Joey走咗喇,問我咩事?我答第一日返工,佢就哦一聲,帶咗我去人事部。

喺人事部,有個好清純可愛嘅女仔幫我搞入職啲嘢,我多口撩佢傾計:「請問點稱呼?」

佢答:「叫我Mandy得喇,你之前見工係見Joey?」

我:「唔係呀,我見Priscilla。」

佢問:「哦,Priscilla我都未見過,佢係Joey之前嘅。」

我:「哦。」

我心諗咩呀?一個月前先見Priscilla咋喎,佢係Joey之前?但而家Joey叫我返工,而家Joey又冇做?

媾女還媾女,都唔理得咁多喇,只係我做落真係發覺呢間公司好多問題,氣氛又好差,第一日已經見到有同事互窒(有火藥味動真火嗰隻),不過你得500蚊稿費,我就唔寫太長喇。總之我做咗10日,唔計星期六日,然後決定辭職。

去到辭職搞手續還staff card嘅時候,我先知原來Mandy都走埋,今次呢個新嘅HR我冇問佢叫咩名喇,亦唔想知,我淨係知道呢間公司嘅離職率好高,當時決定走應該唔會錯。

error: