我個friend上星期又失戀，佢已經第N次發現條仔出去偷食，而每一次分手之後冇幾耐，佢都會衰心軟又原諒條仔，呢種生活已經斷斷續續有4年幾喇。
勸得嘅說話都講過晒，又試過請佢嚟speed dating，最多我畀錢啦，唔一定要識仔嘅，當係散下心，擴闊下眼界，認識多啲新朋友，唔好成日屈住屈住。
幾日前佢先至答覆話唔去，因為佢條仔講咗對唔住，強調以後唔會再犯（上幾次咪講過囉），然後我個friend又一次衰心軟，佢話拍咗4年幾，唔捨得話散就散。
然後噚日佢又打嚟爆喊，話喺條仔屋企個洗衫籃入面，發現咗一條女人底褲。（佢條仔自己住）
我詞彙唔多，每一次歷史重演，我都係講嗰堆安慰說話，真係冇嘢再補充喇，作為咁多年嘅朋友，我有以下兩句肺腑之言：
「當你習慣冇底線去原諒一個人，呢個人亦會習慣冇底線咁去傷害你。」
呢個係我嘅經驗之談。