上星期介紹完求職者去見工，第一時間打畀個HR問得唔得，佢答我：「唔ok喎，都唔夠經驗。」
我：「吓，你話fresh grad冇問題㗎。」
客：「係啫，佢答得唔ok吖嘛，我話連少少相關經驗都冇，驚佢唔可以勝任，佢話雖然自己冇經驗，不過會畀心機學。」
我：「咁有咩問題？」
客：「喂，我公司唔係學校呀，畀錢你學嘢咩，出糧畀你做嘢㗎，人工問佢可唔可以減啲又企硬。」
明晒，唔怪得話fresh grad ok，又嫌人冇經驗咁犯駁啦！原來係壓價不成，最憎人恰細路，好想知呢個HR係咪由阿媽個肚捐出嚟嗰陣，已經附帶咗幾年工作經驗，但係我冇用呢點反擊。
我：「咁我想問，佢係咪應該答雖然自己冇經驗，但都唔諗住學，呢個答案先至正確呀？」
個HR冇出聲，呢個新客係第一次交手，但我明白經此一役之後，無論我轉去邊間公司，大家都唔會再交手，好在我個求職者生性，介紹第二份畀佢成功搞掂咗。