「各位，你哋覺得呢身造型如何呀？會唔會太閃？第一次見評判我想莊重啲，唔會喧賓奪主吖嘛？度身訂造㗎！」做做下嘢WhatsApp group突然傳嚟兩下響聲，先嚟一張相，再嚟上面段文字，原來係老屎忽send嚟。
我第一個反應係回頭問上司：「喂，你未踢『再生張學友』出group㗎？點解佢仲可以喺我哋個群組度send嘢嘅？搵個人答下佢好喎！一係你而家踢佢啦！」啲同事掛住睇阿叔套珠片閃令令西裝戰衣，個個笑到gap gap聲。
另一位同事：「幾有尹光feel喎，不如叫佢轉唱《少理阿爸》啦，話唔定可以殺出一條血路。」
上司：「平時講工作佢喺個group都唔出聲，完全醒唔起佢存在，唔通而家先踢咩，好揚㗎！唔好理咁多，讚咗先，有冇聽過誇誇群呀？起勢咁讚佢就得㗎喇，我先，嗱！我話佢呢身打扮壓到場，有種大器晚成嘅高手feel，跟住你哋附和下啦，唔好太over喎！你哋幾個上次讚佢唱歌啲用詞好浮誇，平實返少少，佢自大啫，傻唔晒㗎！」
見到阿叔舊同事咁揼本訂造戰衣我就放心喇，其實又唔係想佢死嘅，難得有個識嘅人去參加比賽，點都要鼓勵幾句幫佢燃點鬥志同信心，做同事做到咁算唔話得啦！
再生張學友耐唔耐就會分享佢嘅備戰過程，有時仲會拍條唱歌片叫大家畀意見，一個二個冇click嚟聽就出力讚，衰到呢，不過我都冇聽……
公司仲未請到replacement，因為阿叔舊同事之前真係唔做嘢，所以佢走咗係對日常運作毫無影響，仲好似smooth咗添，你話公司有隻害蟲影響幾大吖！
後來有一個風和日麗嘅晏晝，呢位阿叔舊同事又send msg去個group度：「垃圾！成班評判都係垃圾！支咪個echo勁大，話我入錯key，又話我走音，而家係佢哋啲音響有問題呀！副歌唱到一半就叮我，最高潮個位都唔畀我唱埋，然後一輪嘴喺度彈，我嬲嬲地咪屌班評判囉！咁叻你唱吖！痴L線！」
人哋啲音響有冇問題我就唔知，佢有冇guts屌評判都係一大疑問，不過入錯key同走音照計冇屈佢，係咪又到第三隻字先唱第一粒音呀？
上司唔打字，佢直接錄音回覆阿叔：「有冇搞L錯呀！佢哋懂唔懂腰滾㗎！憑咩話你入錯key呀？一定要跟原唱㗎？唱返自己嘅風格唔得咩？如果要同原來嘅版本一樣，咁不如搞個模仿大賽啦，唔好搞歌唱比賽吖嘛！」
我聽到佢錄呢段msg，不禁喺隔籬講咗句：「上次你叫我哋唔好咁over，但係你而家好over喎！」
上司：「話之佢啦，送上慰問，以示關心，腰滾你又唔識，人情世故你又唔懂，快啲安慰佢啦，得我一個唱獨腳戲好易穿㗎！」
雖然無論咩比賽都好，我一樣認為「再生張學友」係冇可能贏到，但係冇諗過會咁快玩完，仲未去到上電視嘅環節喎，咁快就淘汰，件尹光星之碎片戰衣咪好嘥？佢仲要為咗備戰而辭咗份工，呢個犧牲會唔會太大呀？
我：「你估佢會唔會話返嚟做吖嗱？」
上司：「唔會啩，個group咁多人，好唔好意思問呀！」
我：「或者佢私底下call你傾呢！」
上司：「你係咪住坑口？把口咁臭嘅！」
我都唔想咁口臭，最終講中咗一半，阿叔真係話想返嚟做，不過佢唔係打畀上司，而係直接返嚟公司……
跟住呢幕就經典喇，好記得嗰日我9:05返到公司，上司早過我，另外有個別同事仲未返，大約9:20嘅時候，「再生張學友」冇啦啦返咗嚟，個畫面好違和你明唔明？即係以前日日都見佢返工，呢個場景出現過無數次，但你明明辭咗職一段時間，而家突然孭晒袋office hour晨咁早出現，仲要當冇事咁坐返喺原本屬於佢嘅位。我唔識得點形容，佢成個神態同埋動作係好似以前咁返工。
上司都覺得唔對路，但轉數算好快：「咦，返嚟探我哋呀？有冇買西餅先？」
阿叔：「一陣直接請你哋食晏啦，我噚日打返嚟問過HR，佢話你哋未請人，我返嚟做囉！」
我同上司你眼望我眼，疑團1：HR叫你返嚟做？疑團2：老奉畀你返嚟做？疑團3：你唔係霸王硬上弓啩，孭個袋office hour返嚟扮冇發生過呀？呢度好歹都係一間正統公司，咁而家即係點呀？
上司：「衰嘢，咁識講笑，點呀？返嚟搵我哋咩事啫？」
阿叔：「我認真㗎！不過想返嚟親自搵老細傾，又想同你傾，有誠意啲吖嘛！」
上司咁想佢走嘅其中一個原因，就係因為呢個老屎忽好鍾意恃熟賣熟，而且有啲嘢會跨過佢直接搵老細，我上司認為好唔尊重，不過佢EQ高，總係笑笑口面對，所以阿叔當時話要參加中年好聲音而辭職，上司先至會賣力做誇誇群，希望送走個瘟神。
老屎忽講完之後就走咗去搵老細，我上司塊面真係紅晒，跟住去搵HR問清楚咩事。
我哋幾個同事當時心情好沉重，然後上司返嚟話：「問過HR，冇叫佢返嚟喎，係佢自己打畀HR扮傾計，傾下傾下就問我哋請咗人未，又問有冇in緊人，而家佢就自己走嚟搵老細。」
我：「頭先有一刻覺得佢好慘，參加中年好聲音一嘢出局，都係想搵返份工啫，但係諗諗下又唔係，啲行為好唔尊重人，仲要蠱蠱惑惑，從來冇喺WhatsApp問過我哋一句請人未，然後就打去HR度索料，簡單事情複雜化，冇啦，老細個人咁念舊情，又要同佢做返同事喇。」
阿叔入咗老細房大約半粒鐘，我哋嘅感覺就好似等咗一個世紀咁長，後來佢兩個終於傾完，老細搭住阿叔膊頭行過嚟，對住我上司講：「如果我外甥女做得唔好，你唔使畀面我，即刻炒佢，跟住請返我哋個歌神，唉，早知唔應承我外甥女啦！」
阿叔：「歌咩神吖！咪笑我啦！」
老細：「咁你係歌神吖嘛，個中年好聲音唔識貨，總之睇下外甥女點先啦，你知啲後生，三分鐘熱度，佢唔做我即刻call你。」
係咁外甥女外甥女，我哋都唔知佢哋講乜，但係我上司又接到喎，佢話：「係啦！一有位即刻call你，放心！」
老屎忽走咗之後，老細望住我上司講：「得啦，知你咩事，我唔炒人啫，但係都唔會請返走咗嘅人。」
上司：「哦……咁外甥女……」佢想多謝老細，又唔敢講多謝，呢個時候應該真情流露啦！
老細：「我都冇外甥女，你快啲請返個人啦，下次佢再無啦啦貢上嚟，我真係兜唔到㗎喇！」
今次真係要搵小鳳姐出嚟唱《喜氣洋洋》，其實老細知咩事㗎，當時口頭留阿叔只係禮貌性嘅例牌動作，出嚟做嘢大家俾面好落台啫，但你而家老奉咁話要返嚟做，咁就唔怪得人直接落閘喇。
其實當我聽到老屎忽自認係再生張國榮同埋再生張學友之後，我已經深深明白一個道理－－－追夢不分年齡，但係都要有自知之明。