連續5個月遲出糧，雖然每次都係遲3至5日左右，但其實咁樣已經唔啱，仲有，因工作關係有啲嘢要幫公司出住先，要claim嘅錢都累積到萬幾蚊，儘管喺好多人眼中唔算天文數字，不過月復月咁樣拖欠，claim極都claim唔到，真係會有啲不安。
或者你會話拖糧就搵勞工處囉，係嘅，揸正嚟做絕對可以，不過呢個老闆未去到大奸大惡，極其量可以話佢蠱惑，舉個例，遲出糧佢會認，亦識得講唔好意思，係咁賴啲客找數慢呢樣嗰樣，但問題係就算客人唔找數，都唔代表你嘅員工冇做嘢，都唔代表拖糧員工要接受遲出糧，更何況以我哋嘅認知，客人拖數嘅情況冇老闆講得咁嚴重。
因為都忍耐咗接近半年，我覺得已經變成慣性，呢間公司再做落去有一定風險，claim幾百蚊又拖，claim幾千蚊又拖，所以把心一橫決定辭職，老闆有挽留。
「做得好地地點解走呀？」
我照直講：「因為公司每個月都遲出糧，同埋claim錢都累積到五位數，好老實，我嘅感覺唔係咁好。」
個人認為既然係老闆嘅問題，我冇理由作個藉口又兜個大圈去粉飾，雖然佢繼續挽留咗幾次，但我去意已決。
公司要請人代我，老闆見下見下都搞咗兩星期，終於搵到人選代我，對方又要隔多幾日先可以返工，所以我同新人交接工作嘅時間只剩返一星期，呢個時候老闆向我提出咗兩個要求，第一個係想我做多半個月至一個月先走，但我拒絕，正常出糧都拖，做多陣先走肯定份糧仲難搞，我唔想爛尾。
「咁你唔好同個新人講辭職原因啦，因為呢個求職者見工嗰陣問過上一手點解resign，我求其話你要移民，你千祈唔好講公司遲出糧嗰啲問題，我費事嚇親佢，幫幫手配合下。」
其實我聽完有啲嬲，你點可以亂咁作我要移民，香港有幾大呀？喺街撞到絕對唔出奇，我唔想老闆講大話而要我去圓謊，所以絕對唔會答應配合。
我：「明白你嘅立場唔想令個新同事對公司冇信心，我極其量係唔答，但唔會講大話呃人，香港好細，喺街撞唔到，都隨時喺同一行遇到。」
如果你唔想新同事聽到我真正嘅辭職原因，最好方法就唔好要我同個新人喺時間上重疊，大家好做，你又要我教新人，又要我配合你呃新人，咁就絕對唔得，你公司想有個好名聲，難道我個人形象又唔使咩？
聽完老闆想我講大話呃新人嘅要求之後，我更加唔後悔辭職嘅決定，老實講當時我係未搵到新工（而家已經有著落），諗返轉頭真係覺得resign絕對明智。
咁最後新人有冇問我？冇呀！因為個新人no show，預定返工嘅日子並未出現，老闆又叫我留多陣直至請到人，No la！
最尾嗰期糧又係遲咗5日先出，另外要claim嗰萬幾蚊先好笑，話會連埋最終一期糧同時轉去我戶口，可惜承諾冇兌現，跟住又話要埋數等多一個月，勁多藉口，結果我離開間公司三個月仲未收到，要再打返去追，冇錯，最後都有找畀我，不過真係好冇癮囉！