我唔覺得阿朗低低地 佢只係反應慢少少

投稿讀者:曾女士

我開嗰間便利店不知不覺經營咗5年,期間請過好多員工,有學生哥、有師奶、有中年轉行嘅人,亦有啲暫時搵唔到人生方向,一睇就知係「做住先」嘅人,不過以上好多員工都唔會做得太耐(師奶會耐少少),唯獨是有個男仔由我開業至今都冇走過。

呢個男仔叫阿朗(已化名),30歲,佢係有啲啲唔同,例如會成日自己同自己講嘢,無端端自己笑,無法完完整整講出一句說話,而且佢會機械式咁講:「有咩幫到你呀小姐?」就算個客係男性,佢都只會講:「有咩幫到你呀小姐?」

個客畀錢,正常店員會講:「39.5,八達通定係信用卡?」

不過阿朗仲係會連續講兩次:「有咩幫到你呀小姐?八達通,好吖,有咩幫到你呀小姐?」

試過有個阿叔話:「我係先生呀,小咩姐呀!」佢都係答:「係,唔好意思,有咩幫到你呀小姐?」

後來我慢慢發現阿朗應該係太緊張,嘗試過幫佢同教佢,情況好咗少少。

曾經有客人同埋其他員工反映過呢個問題,甚至有人話佢「低低哋」,但我唔認同,阿朗絕對唔係「低低地」,智力冇問題,叫佢做嘢由最初不知所措,到後來話頭醒尾,唔使叫都識得自動自覺去做,我感受到呢個男仔其實有下過苦功,只係應對方面比起其他人慢啫。

由於阿朗已經做咗5年,便利店真係畀唔到太大嘅人工升幅,所以我問過佢:「有冇打算出去搵其他工呀?你唔會覺得喺呢度個世界好細咩?」

阿朗聽完之後顯得有啲慌張,以為我想炒佢,然後阿朗話自己之前做茶餐廳嘅時候,老闆同埋部分樓面都叫佢做低能仔,成日玩佢,又當住好多食客面前係咁鬧,佢覺得好難堪,而家喺便利店感覺唔同,除咗收錢,其他時間做好自己嘢就得,起碼應付到,唔使畀人閙,又可以自食其力,覺得好自在同埋好舒服。

冬至同事想調更,阿朗完全唔介意,我叫佢唔使同人調啦,不如返屋企同家人做節,佢話家人唔太鍾意佢,加上細佬打算叫女朋友返屋企做冬,講到明唔想佢留喺屋企,驚阿朗會影衰晒……

阿朗係善良到點呢,細佬話佢出現會影衰晒,我完全睇唔到阿朗有埋怨嘅語氣,相反地,佢流露出諒解細佬決定嘅表情,仲同我講:「舖頭暖好多,如果唔係萍姐(其中一個同事)調更,我喺街行仲凍,我鍾意呢度呀。」

我覺得自己間便利店提供唔到好前途畀人,但原來對阿朗嚟講,我呢度係佢嘅大世界,係佢嘅避風港,起碼喺寒冬之下,佢喺舖頭裡面仲覺得溫暖,我第一次覺得自己間便利店唔止純粹係搵錢,原來仲可以幫到人。

error: