疫情重創之下，好多東南亞地區嘅工廠都已經倒閉或者停產，當年經我間headhunt搵到份駐柬埔寨工作嘅Dave算比較好彩，佢公司間廠仲健在，但亦正正因為咁，Dave知道出面市道比起當年搵工時更差，只要佢一唔做，唔使等聽日，即日下午已經有人頂上。
因為Dave年紀唔輕，當年失業後足足搵咗一年先等到offer，不過都要持平講句，有冇疫情都好，製衣業喺香港本身已經係寒冬，特別係外資唔再一面倒依賴內地工廠之後，大量訂單早已拆散晒分佈至柬埔寨、越南、孟加拉，甚至係緬甸等國家，2020年加埋疫情反覆折磨，歐美訂單插水式下滑，情況雪上加霜，好多公司同埋工廠執得就執，不斷萎縮。執筆前稍微做咗少少資料搜集，柬埔寨目前已經有超過250間成衣工廠停止生產，受影響嘅當地工人超過10萬。
Dave份工係駐柬埔寨金邊，本身有二十幾日大假，過往要間中返香港處理公事同開會，故此返呢份工初期嘅影響未致於太大，平均每個月都可以返嚟見屋企人幾日，佢太太同埋兩個仔亦試過一次去柬埔寨探望，順便當係旅行，但2020年疫情大爆發，Dave只係年頭見過屋企人，用咗其中幾日大假，然後業務上暫時唔需要往返香港，而且返嚟要隔離14日，隔得嚟已經冇大假剩，只可以遊飛機河。
由於唔想影響到家人同埋朋友，Dave都怕自己喺當地感染，再唔知頭唔知路將病毒帶返香港，一陣惹到屋企人甚至係鄰居都唔好，眨下眼就快一年喇，而家連做冬都係靠視像，仲要唔知呢個疫情要搞幾耐先完，冇盡頭嘅感覺係最無奈。
Dave好掛住屋企，有考慮過辭職返港，但當年搵咗成年先有offer嘅情景仍然歷歷在目，搵食對好多人嚟講都係艱難，對於一個50+嘅人而言就難上加難。
佢太太非常體諒，仲好風趣咁安慰返Dave轉頭：「仲好啦，一陣有咩事變咗做冬群組，真係會累死好多香港人，雖然話冬至大過年，但留得住條命仔先係最緊要，將來大把機會一家人食飯。」
2020唔係好嘅一年，太多唔開心嘅事發生，生活又好、工作又好、人生方向又好，甚至係社會上一連串事件，幾乎已經將每個人嘅情緒同埋精神狀態壓到最低點，身邊人嘅體諒真係好重要。
Dave唔係唯一一個有家歸不得嘅人，正如佢太太話齋，留得住條命仔先係最緊要，期待2021年會有更多好消息，大家都要頂住呀！