「呢個衰仔，冇用㗎，平時有利是都唔收，又唔知自己賺得少。」
我阿叔忽然爆seed，係因為拜年嗰陣有親戚畀利是佢個仔，所以借題發揮。
阿叔個仔係做類似品質檢定嘅工作，之前有客封咗大利是，但佢個仔唔肯收，阿叔並唔認同呢種清高行為：「你真係冇出息，每個月人工幾多呀？餵到埋嘴邊都唔食，你唔收，大把人收呀！」
佢個仔梗係躁啦：「關有冇出息咩事呀？呢啲利是唔收得㗎，收咗就要鬆手啲放佢批貨，犯法㗎！」
見佢哋嘈到面紅耳赤，我忍唔住講咗一單親身經歷出嚟，當係幫手緩和氣氛，同時以另一種方式教育阿叔，硬橋硬馬盞未到赤口已開年。
當年我做過幾個月布行，有時啲客同我哋大量買布，就會搵中立機構嚟抽驗品質，過程大約係隨手揀幾匹布，然後我哋成碌咁擺上驗布機，負責驗布嘅人拎住支粉筆，見到有瑕疵嘅地方就圈起佢，最後有一套準則去界定匹布算唔算合格，細節唔多講喇，畢竟要表達畀阿叔知道嘅唔係工序。
記得有個驗布師父一早嚟做嘢，個樣十分認真，直至我布行個老闆叫佢lunch time一齊飲茶，大魚大肉之餘再塞咗封利是比佢，之後我就見到呢個師父笑返喇，下午返嚟再繼續驗，佢竟然同我哋傾計講笑，最後嗰批布梗係過關啦。
我：「阿叔，如果有人走去舉報，佢唔止冇咗呢封利是，仲隨時冇埋份工，印象中嗰封利是好似係1500蚊咋，我睇住老闆入錢封利是㗎！咁就買起咗佢嘅專業同人格，就算封利是係十倍價錢，一個人份工同埋名譽又點止值咁少呀？呢啲先係冇出息呀，你個仔行得正企得正，去到邊都可以抬起頭做人，你應該覺得驕傲先啱。」
阿叔冇出聲，咁即係認同㗎喇，因為其他親戚覺得有道理，阿叔咪覺得有face囉！老一輩嘅成長環境同埋文化，係佢哋做咗半世人嘅信仰，年輕一輩好難三言兩語就扭轉，最緊要我哋知道自己做緊乜，相對於同長輩嘅口舌之爭，做好自己再向後輩同下一代灌輸正確觀念更為重要。
由細到大都講恭喜發財，而其實財富都係要靠自己雙手，循正途賺返嚟先至最開心。
我哋可以冇出息，但唔可以冇底線。