「你好呀！我哋係XX寬頻，睇返先生你個合約就到期，不如續張新約再順便升級吖。」
因為公司有同事專門幫人請telesales，所以我好明白呢行係幾辛苦，簡簡單單講句唔需要就得，佢好做時你好做，特別係夜晚或者假日打嚟嘅telesales，雖然我唔會幫襯，但都會體諒佢哋嘅工作壓力，問題係……
我：「唔需要喇唔該！咪住，我好似兩個月前先續咗約，唔通記錯？你見唔見到我幾時約滿？」
「哎……係呀，就到期，今年到期喇，續約好抵喎，仲可以升級。」
我：「今年幾多月到期？」
「哎……今年12月。」
我：「而家2月咋喎！」
「係呀，不過升級真係好抵㗎！」
初三赤口唔使嬲，再講一次唔需要，唔該晒，禮貌地收線就ok，佢都係搵食，明白嘅，只係我覺得sales唔係咁做。
早前因為條腰勁痛，有個朋友鼻敏感做開針灸，所以介紹我去佢嗰間中醫藥中心按摩，因為駐場有專業按摩師，咁就去試一試啦！求其搵咗一個老師父，應該都有60幾歲，按得幾好㗎，不過sell嘢就過晒火位。
第一次去，佢已經一路按一路叫我買套票，無所謂啦，反正都需要，佢亦只係職責所在，但當我按完落樓下畀錢嘅時候，師父就衝落嚟喝住職員：「貴啲嗰隻，貴啲嗰隻。」連佢舖頭嘅同事都呆一呆，都係嗰句啦～～搵食啫！
買咗10張套票都要繼續去，撇除衝落嚟要我買「貴啲嗰隻」呢下，坦白講老師父都幾好傾嘅，所以第二次再搵佢，好遺憾又係一路按一路sell，今次仲唔係幫自己間中醫藥中心sell，而係sell我出去做電療，過程係咁嘅
👇👇👇
師父：「你腰骨痛做電療有用呀，我徒弟識做，700蚊一次，係呢，你上次咪話朋友鼻敏感嚟針灸嘅，電療都幫到佢呀。」
我：「考慮下先，未必需要住。」
師父：「我打畀徒弟問下佢幾時得閒先，你了解下囉，不過唔好咁大聲傾喎，費事畀出面聽到。」
由於按摩只係按到一半，實在唔知畀咩反應，而且都係老人家，我比較主張客氣啲，結果師父真係打電話畀佢個所謂「徒弟」，簡單交代兩句就遞個電話畀我，其實我當時係瞓喺按摩床，塊面向下，亦即係向住個窿，而電話另一邊係一位重鄉音嘅大媽，我求其敷衍兩句話考慮下就收線。
師父：「一陣按完我會先落樓，做電療嘅地方喺隔離幾個舖位間按摩中心，你唔好比佢哋知呀，我哋下面等。」
搞掂晒之後，一推門就見到師父喺一間足浴店門口向我揮手，佢話到時喺呢度做電療，再千叮萬囑唔好同中醫藥中心職員講，唉！我都明搵食艱難，不過咁樣係唔啱㗎，一來係職業道德問題，二來電療點可以亂做㗎！我冇向佢公司舉報，只係隔日打去問職員：「其實我啲套票可唔可以轉師父？」好在對方話可以，任約其他師父同埋轉去其他分店都冇問題，咁我就安樂晒喇。
我唔係top sales，公司啲乜嘢top billing從來都唔關我事，更加唔會睇教人sell嘢嘅雞湯文、書本，同埋影片，我只知道賣一樣嘢畀人，你有金錢利益，對方亦都要有實際作用，咁先為之交易，想做成一單生意可能要練技巧，但如果要同人做一世生意，重點係夠老實，唔會搵人笨柒，咁先至會有回頭客。
買一次可能係畀面，可能係唔識拒絕，亦可能係太多錢無所謂，但係點樣都好，呢種生意頂盡做到一次，點解咁多人做sales，有人可以發達，有人仍然餐搵餐食餐餐清，分別就係呢度。