其實👉👈…👉👈…👉👈我勉強都係4分1個混血兒，只係冇混血兒嘅俊朗面孔咁解啫…😭
團年飯有印尼菜，因為我阿爸係印尼華僑，所以嫲嫲在生時會煮家鄉餸，雖然而家嘅團年飯得返我、細佬，同埋阿媽三個人，冷清咗好多，不過我阿媽都會煮返一兩味印尼嘢應節。
我呢個衰仔從來都唔識講一句印尼話，圖片中個餸係用臭豆、蝦仁、豆腐，仲有辣椒呢4樣嘢嚟煮，送飯一流，我問阿媽呢個餸點稱呼，佢話係「拔爹」，我唔識印尼話，唯有拼音，總之個音就係「拔爹」。
雪櫃有盒喺印尼商店買嘅黃金糕，由細到大都好憎，但由細到大都見到佢喺新年出現，明明係印尼嘢，又話made in Indonesia，但個名就係叫Xin Xin欣欣，真係好奇怪，logo個小朋友樣仲勁恐怖，鬼娃娃咁款。
年三十晚，食飽飽同你哋拜個早年先，祝人人有工做，今年事事順利，身體健康最緊要，大家都賺多啲錢！