搵間好公司，不如搵個好上司，幾年前買你《辦公室日報》月曆有呢句金句，我真係覺得好有道理，因為而家我正正遇到一個好上司。作為一個Sales，客人講價壓價絕對係工作一部分，而上司從來唔會匿喺後面，佢係會衝出嚟解圍。
首先呢個上司會叫我哋用佢個名嚟擋，例如個客問：「可唔可以平啲？」「齊頭啦！」「平畀我啦，下次再落多啲！」佢就吩咐我哋答：「問一問阿頭先。」最後梗係唔得啦，總之佢就唔怕做衰人，唔會要我哋班細嘅難做。
如果個客依然死纏爛打不斷撳價仲好玩，我上司會直接同對方傾，好似早兩日咁，有個客叫我做40% discount畀佢，理由係……
「其實我3年前同你哋買過㗎喇，點解貴咗咁多㗎？你做返個舊價畀我啦！我都要同老細交代㗎！」
上司知道呢個客煩咗我幾日之後，一早已經交帶今次要畀佢講，我即刻坐埋一邊一路聽一路學嘢，開咗speaker表演㗎！
上司：「喂，你好呀，我係Debbie個同事，價錢方面係咪有咩問題？」
客：「梗係大問題啦！比起之前貴咗咁多！」
上司明知故問：「你上次落order係幾耐之前呀？」
客：「3年前囉，加咗咁多？」
上司：「哦，即係你上一次幫襯已經係3年前，明白，不過我哋加咗價喎！」
個客似乎feel唔到寸緊佢咁耐先落一次單，竟然仲好意思講價，熟客都同你爭取下吖，3年一次喎！
客：「我知你哋加咗價，不過我報咗之前個價畀老細，你加咁多好難交代㗎！」
上司：「咁大膽嘅你？唔係問咗我哋攞quotation先覆實個價畀老細咩？你唔update咗先？」
客：「冇諗過你哋加咁多吖嘛！」
上司：「唔係喎，你而家要求呢個價係3年前個價喎，冇諗過我哋加咁多，都唔會係舊價吖，不如我問你一個問題先吖。」
客：「問咩？」
上司：「你呢3年有冇加過人工？」
客：「做咩咁問？」
上司：「因為加價同你加人工一樣，成本會上漲，嗱，不如咁啦！你畀一張3年前嘅糧單，同埋一張最近嘅糧單我睇，如果你3年嚟都冇加過人工，我私人幫你出差價，今次畀你用3年前嘅舊價落單，下次先加返，咁你咪有得同老細交代囉！」
客：「你即係為難我啫，點會3年冇加人工呀？」
上司：「咪係囉，點會3年冇加價呀？如果員工嘅人工加咗，啲服務同貨又唔加價，中間個差額邊度嚟呀？」
客：「但係計返比例，你哋加價加得多吖嘛！」
上司：「多定少好主觀㗎喎！你老細呢3年加咗你幾錢人工吖？夾夾埋埋有冇加咗1萬蚊？」
客：「邊有咁多呀？正常打工仔3年都唔會加到1萬蚊咁多啦！」
上司：「如果主觀角度，你咁努力幫公司壓我哋個價，我就覺得你份糧呢3年內最少要加1萬蚊先合理喇，你咁盡責喎，但你老細3年都加唔到你1萬蚊，佢好明顯覺得你唔值啦，所以加幾多先叫合理呢個問題，我同你老細已經唔同睇法啦，邊有標準㗎！」
客：「真係唔可以做返舊價？」
上司：「你真係證實到自己3年都冇加人工，我咪畀返3年前個舊價你囉，講過就係㗎喇！Btw，如果你覺得我哋貴，仲有另一個方法。」
客：「仲有咩方法？」
上司：「你有冇同其他公司攞quotation先？我哋個價就好實嘅，會唔會其他公司平啲呀？你可以試下quote第二間喎！」
客：「Quote咗啦，都係差唔多。」
上司：「唔怪得啦，聽同事講你問咗幾日，我心諗點解覺得貴又唔試下同第二間買呢，原來大家個價差唔多，抑或我哋仲係最平嗰間呀？冇理由你同老細報咗個舊價，趕住要交代都仲搵我哋㗎嘛，搵第二間唔會快啲咩？」
寸到個客一戙都冇，最後佢冇再講價，但亦都冇落單，上司話呢啲生意冇咗唔需要覺得可惜，一來好日唔發市，二來行埋嚟就壓咗價先，三來先斬後奏報價畀老細然後迫我哋就範，集齊晒所有西客具備嘅元素，呢單生意做到都唔係好事。
上司話以佢嘅經驗，真正嘅大客係好爽，唔會拘泥於細節，反而呢啲細客+西客就算開到張單，過程中都會有其他麻煩嘢，例如要求多多，甚至最後會拖數，呢個機會率高達9成，不如let it go唔好浪費時間，隨時得不償失。
我：「如果佢頭先答你3年冇加過人工，你係咪真係會減畀佢？」
上司：「減！自掏腰包都畀discount，咁可憐喎，當獎勵佢啦！老細3年冇加人工，仲要好似忠誠的狗咁樣幫公司壓我哋價，豪畀佢一次囉！可惜吖，好明顯佢就有加人工，亦都問過其他公司報價但計唔掂條數，又想喺老細面前邀功，過主啦！佢難交代關我咩事呀？」
其實上司全程寸個客都係笑住咁講，佢話勞氣同埋認真會好傷身，對住西客一定要用「笑佢on9怕佢嬲」嘅態度，仲話：「咁樣先激死佢吖嘛！動真火就唔好玩㗎喇，要好似撚狗咁撚法先過癮㗎！」