隔籬部門有個女同事真係令我大開眼界，佢日日都OT到八九點，但係又會返工時間無啦啦唔見咗人，而佢基本上係唔做嘢，公司有閒錢養埋呢啲人簡直不可思議，上個禮拜終於炒咗喇，老老實實，炒得遲啦！
可能你會覺得我好黑心，點解呢個時勢有同事被炒仲會咁興奮，咁你真係要聽埋我講成件事先再作定論，首先佢OT到咁夜，係因為呢位女同事經營咗一間IG Shop，晚晚就喺度處理佢秘撈啲單同埋覆留言，完全唔係做公司嘢。
咁佢賣咩呢？就係將淘寶啲衫當韓裝咁賣，仲會夾雜啲A貨袋仔、圍巾、手錶，佢sell過我哋㗎，不過拎個袋返嚟嘅時候好多人都話見到就覺得假，而呢位女同事亦強調冇扮真貨，純粹以一個好抵嘅價錢賣超A貨，講出嚟都唔面紅㗎喎！
有時我都唔明點解淘寶啲衫可以當韓裝賣，後來有朋友話其實出面啲街舖都好多人咁做，一樣有生意一樣照生存，難怪有市場啦，不過佢IG Shop啲衫寫住最新韓裝，而衫嘅tag又made in China，咁都冇問題？
我哋每日都睇住佢用個唔知咩軟件同淘寶啲商家傾嘢同攞貨，已經做到明目張膽，喺公司都完全唔會避忌，個感覺就好似佢當呢度係share office，租咗張枱專心做自己生意一樣，不過咁都未算惡。
有次我handle緊嗰張單去到佢度停咗，隔咗兩日都未process，個客催吖嘛，我迫於無奈咪要走去同佢交涉囉，點知佢當時忙緊打理自己啲秘撈，眼尾都冇望過我，但係聲線急促地同我講：「係咪公司嘢？公司嘢咪煩我，搵緊大錢呀！」
佢旁邊嗰位同事都搖晒頭，然後私底下幫手跟埋張單。後來我同仗義幫忙嗰位同事講：「你有冇聽到呀？佢話搵緊大錢喎，即係我哋成班返工都係搵緊細錢呀？唔講以為佢做Banker，秒秒鐘幾百萬上落，聽完都唔知好嬲定好笑，我唔識畀反應。」
「知㗎喇，我哋個個都知，同阿姐講過啦，但係阿姐冇行動可以點啫？」
我：「其實你阿姐係咪同佢有親戚關係㗎？咁都忍到？我見好多email都係得你哋跟，佢唔理唔覆好似稻草人咁。」
「阿姐同佢冇關係啦，請返嚟㗎，不過佢初初唔係咁，後來先至見佢開IG shop仲叫我哋買之嘛，可能一直有賣開都唔定嘅，佢同我哋講過，呢份秘撈賺得多過公司份糧吖嘛，或者真係搵好多呢！你見佢咁忙都應該好多生意。」
我：「秘撈搵好多係佢嘅事吖，我又唔係眼紅，不過啲嘢去親佢嗰度就會完全停晒，佢有私幫生意啫，我冇呀，自己搵食都唔好阻到其他人搵食好冇？同埋會唔會叫人唔好講公司嘢，阻住佢搵緊大錢咁呀？」
「我同佢同一個部門，你覺得我哋唔嬲咩？」
嬲就做嘢吖嘛！由於愈嚟愈多同事投訴，有次唔知邊間中港速遞仲送咗幾箱貨嚟，疉到人咁高（睇得出佢幾好生意） ，送去office喎，用公司地址收私幫生意啲貨喎，我真係覺得佢惡過烏鴉同志雄哥囉！
結果佢阿姐忍咗咁耐終於出聲，嗱！講緊出聲勸喻咋喎，冇話炒㗎。聽返佢部門啲同事講，阿姐好聲好氣提佢唔好寄啲貨嚟公司，但佢話冇辦法，屋企冇人收件，又趕住pack貨寄出去，個阿姐就叫佢考慮下不如全職run間IG Shop，你估下呢位女同事點樣答？
個女同事反客為主叫阿姐炒佢，因為自己辭職要坐多一個月，同埋公司炒佢可以有多一個月人工賠……難怪佢做生意可以咁成功，計到盡都不特止，仲具備作為成功商人嘅特質－－－厚顏無恥，呢位同事簡直係被正職耽誤嘅商業奇才。
本身件事就進入咗膠著狀態，好在個阿姐又醒返次，捉到佢痛腳大條道理遞上大信封，一蚊都唔使賠，嗰隻痛腳就係有一日佢部門要同客開會，約咗晏晝3點左右，呢位女同事好似人間蒸發咁消失咗，廁所唔見人，打電話又唔聽，4點先再喺office出現。
去咗邊呢？原來個女同事都係喺office，不過係post office，即係郵政局，佢話有幾件貨要寄，但係好多人，冇諗過要搞咁耐喎，結果公司就用擅離職守為由同佢解除合約，雙方都唔使賠，總之即刻走。
喺我個角度嚟睇，我會覺得好多餘，其實一個員工喺公司做自己啲兼職，仲要用office去收貨，呢啲理由一早就炒得啦，使乜仲同佢講人情同埋搞到咁複雜呀？由始至終我都認為打工仔私下有秘撈唔係問題，不過影響到其他同事做日常工作就有好大問題喇。