有個印度舊同事叫我出嚟飲嘢，佢住喺香港好多年，你可以想像佢講廣東話係喬寶寶level，不過身型就係瘦削嘅，仲要幾型仔，佢喺我舊公司做IT方面嘅Recruitment，不得不承認印度喺IT方面真係好強。
「下星期酒吧開返，叫埋大家出嚟飲嘢啦！」
我：「飲你條命咩，Stay home呀！」
「妖！武漢肺炎算老幾呀？嚟恆河飲啖水先啦！」
佢真係咁樣講，好霸氣，唔止中文好過我，膽識亦都遠遠超越我。
今次呢個疫情睇清楚好多嘢，有啲地方確診數字唔多，唔係因為冇傳播，反而係因為太落後，太封閉，報喜不報憂，有武肺都check唔到，或者冇得check，資訊同真相完全唔透明，可能死咗過萬人，不過被當作一般肺炎或者普通病死，我覺得愈係話冇事嘅地方就愈危險，根本唔係冇事，而係唔知道有事，甚至係刻意隱瞞所有事。（呀！武漢最近又話自己冇事，零確診！）
印度同事之所以咁大膽，可能因為佢覺得武漢肺炎已經有解藥，冇錯！美聯社之前都出咗條片，印度人堅信牛尿能醫百病（ https://youtu.be/ibapamASW7I ），當地組織較早前仲搞咗一場活動，萬人空巷飲牛尿抗武肺。印度甚至已經幫十幾種牛尿註冊咗專利，話要當商品推廣到全世界，豪言要超越Coca Cola喺飲品界嘅一哥地位。🤦🏻♂️
不過咁，都有唔少印度人認為武肺太堅，飲牛尿唔足夠，所以用牛屎沖埋涼……呢條片冇咩事唔好睇喇，純粹想話你知我冇老作啫 ( https://youtu.be/_QzKbMF7Kz0 )
點解我個同事覺得恆河水勁過武肺？其實唔係貶意，反而係敬意，因為佢哋認為恆河能淨化一切，包括病毒同埋惡靈，仲有種講法係，飲一啖恆河水能醫百病，講到明唔准煲唔准過濾喎，要即飲先至會有最好效果，否則就係不敬。
印度4月頭先開始正式封國，當歐美確診數字已經萬萬聲嘅同時，印度都係榜上無名（其實仲有幾個東南亞國家都係），冇乜確診數字公佈，或者數字睇落唔多，愈係咁就愈驚，所以即使疫情過後，有啲國家同地區都要睇定啲先可以去，粉飾太平無非係唔想影響旅遊同埋經濟，但就犧牲咗好多平民百姓嘅寶貴生命。