呢單嘢18年前喇，點解咁記得呢，因為當日我哋成班同事得悉哥哥張國榮逝世嘅新聞，有人仲話太震撼唔敢相信，適逢係4月1號愚人節，所以印象非常深刻。
嗰間係我之前再之前再之前嘅舊公司，有個同事叫阿益（都費事幫佢改名），佢無啦啦將自己枱面成疉雜誌執落一個紙皮箱，所以枱面一下子乾乾淨淨，大家梗係奇怪啦，阿益就對住我哋講：「畀人炒咗喇，今日last day！」
我哋幾個同事都覺得好突然，係咁追問阿益咩事，佢仲好認真咁話同經理吵咗鑊，所以冇得返轉頭。
當時距離放工得返半個鐘，大家都好唔開心，結果有人提議即晚去食散水飯，除咗一位同事要同老豆睇跌打推唔到之外，我哋部門另外5個同事都一齊出席，我直情係推咗當年個女朋友睇戲，寧願嘥咗兩張戲飛都要同阿益farewell。
咁都未算，當晚餐farewell飯仲call返兩個已離職同事出嚟，其中一個仲特登飛的嚟銅鑼灣食飯，所以我記得好清楚㗎。
當晚餐飯傾咗啲咩已經好模糊喇，始終係十幾年前嘅事，不外乎係問下阿益同經理嘈咩，之後有咩打算，再一齊講下經理壞話咁啦，諗返最嘔心係幾個同事食完飯都攬一攬阿益，因為事出突然，正常都真係唔捨得。
呢個大話當晚已經被揭穿，因為其中一個同事太有正義感，佢返到屋企之後直接打電話質問經理，質問對方點解無啦啦炒咗阿益，然後經理梗係發晒癲啦，根本就冇件咁嘅事，我哋同經理嘅關係本身唔算好close，所以搞到好面懵。
你知唔知最嬲係咩？係我哋之後打返畀阿益，佢竟然話係愚人節開玩笑，佢執走啲雜誌純粹係想拎返屋企，見我哋會錯意就順勢玩下，最乞人憎係佢呢句：「唔係唔玩得呀？」
第二日大家都躁咗，愚唔愚人節都好啦，開玩笑始終要有個底線，唔係肉赤餐farewell飯，咁多個人請你，一人都係夾多少少，其實同事一場，你無緣無故想我哋請食飯都冇問題啦，最嬲係阿益利用咗大家嘅同情心，連已離職嗰位舊同事都撲出嚟同你食飯，好唔好意思呀？
經理第二朝叫咗阿益入房，屌足佢成粒鐘，雖然大快人心，但我覺得最難為係代佢出頭鬧經理嗰個同事，尷尬到暈，雖然已經知道係阿益搞鬼，但係鬧咗就係鬧咗，點都有啲芥蒂。
自從嗰次之後，我好憎聽到人哋講：「唔係唔玩得呀？」或者「唔係咁都嬲呀？」好多時本身件事冇嬲，但聽到呢兩句之後就真係火都嚟，好心咁大個人就有啲分寸啦！
投稿讀者：哥哥fans