唔知係咪市道唔好驚公司炒魷，我身邊幾位長期嗌辭職嘅死黨都收歛咗，冇再呻過唔想撈，咁都好正常嘅，現階段搵工嘅難度的確係高咗，偏偏我公司有個阿姐就天不怕地不怕，連老細都照閙，寸過碼頭咕喱。
我所講嘅「阿姐」，唔係department head嗰啲阿姐，而係公司個清潔阿姐。
通常阿姐都有幾類，我舊公司係清潔阿姐同茶水阿姐分開，而家呢間公司就係一個阿姐包辦晒，除咗倒垃圾、吸塵、抺枱抺窗，仲要洗廁所（office裡面有自己廁所），同時兼顧pantry嘅清潔，咁當然係全職價錢啦，人工唔係話好高，但正常冇刻薄，福利都有齊。
我哋之前個阿姐其實好正常，仲做咗好多年，不過佢腰骨痛，睇完醫生之後話坐骨神經有問題，所以要做物理治療休息一排。其實聽佢嘅口吻都係想退落嚟，畢竟已經62歲，想享下清福都好正常。
老細另外封咗大利是畀之前個阿姐，因為佢咁多年嚟都做得好妥當，唯一唔妥當就係介紹咗個friend嚟頂替佢，當時見有熟人介紹，公司基本上諗都冇諗就請咗，點知呢個新阿姐咁鬼經典。
第一日返工，新阿姐已經黑口黑面，好似咩都識唔使人講咁㗎喇，冇問題冇問題，知佢醒，知佢一樣有清潔同茶水阿姐經驗，但係基本嘢例如清潔劑擺邊，茶包冇晒要去邊度拎，你都畀人講解下吖，呢啲嘢間間公司唔同㗎嘛！
新阿姐朝早吸塵嗰陣係唔會理你做緊咩，總之吸到埋你個位就大大聲叫你縮腳，有次我同個客講緊電話，佢好大聲叫：「縮腳啦！」我個客喺電話另一邊都窒一窒。
仲記得個客問：「你home office呀？」
我：「唔係呀，喺公司呀。」
客：「公司？咁大聲喝你縮腳，我以為你媽咪拖地。」
我：「嗰個係我公司嘅清潔姐姐。」
客：「嘩，幾惡喎。」
最黐線係有一次，有個男同事喺廁所行出嚟，新阿姐已經喺門口連珠砲發：「頭先我洗廁格見到地下有尿，你哋行前啲屙得唔得啫？係咪想做死我呀？你哋屙尿係咪好似扭呼拉圈咁屙㗎？」
嗰位男同事勁老尷，因為個廁所喺office入面，新阿姐大聲到半層樓都聽到，其實個男同事啱啱先出嚟，上一篤尿好明顯唔係佢啦，擺明搵個人出氣，雖然有人屙到周圍都係的確好乞人憎，不過你都冇理由求其搵人祭旗吖。
類似事件喺pantry亦發生過，有個新入職妹妹第一日返工，佢行入去斟杯水，阿姐無啦啦指住佢嚟鬧，好似係話啲杯要洗就擺落鋅盤，飲完咖啡就要浸埋水，唔好次次就咁擺喺度，下次唔浸水就唔幫佢洗。首先我想強調呢個阿姐講嘢嘅語氣係好惡劣，佢永遠唔會好好地講，一開口就好大聲，搞到周圍啲人以為你做錯嘢，其次係個新入職妹妹第一日返工咋，佢第一次行入pantry咋，佢幾時有次次就咁擺啲杯喺度呀？
當時有另一個同事睇唔過眼出聲，話啲杯唔關個新人事，點知畀阿姐鬧返轉頭，話咩人人都關事，新人就更加應該要知，結果代出頭個同事敗走pantry，真係好佬怕爛佬，爛佬怕潑婦。
基本上好多同事都受過新阿姐嘅氣，佢長期西口西面，下下都嗌破喉嚨咁話人，最慘係完全冇point，唔係話睇唔起或者貶低基層員工，但冇理由妹仔大過主人婆，佢應該係輔助我哋，唔係兇返我哋轉頭，唔好理職階先，佢本身態度都好差，老細都唔會咁樣對我哋。
講起老細，呢位新阿姐係連老細都照鬧，名符其實係一位死士，你又真係吹佢唔漲。事源老細買咗部咖啡機返公司，擺喺pantry畀大家一齊用，新阿姐見到即刻大大聲話阻掟，又話之後要抺多樣嘢。有人同新阿姐講，部咖啡機係老細㗎，點知新阿姐惡到咁答：「老細又點呀？多餘就係多餘！」
唔記得講重點，當時老細都喺pantry……
結果唔使我講啦，其實冇人想見到炒人場面，何況係一個阿姐，呢個時勢好陰公㗎嘛，所以平時大家都忍住唔出聲，不過呢次係老細落聖旨，真係冇辦法。
或者有人聽完呢單嘢會企喺新阿姐嗰邊，始終社會風氣係鋤強扶弱，但我想講呢種心態唔適合用喺呢位阿姐身上，佢的確係寸過碼頭咕喱，同事返工最大壓力竟然唔係老細，唔係客，係來自呢個阿姐，點講都唔通啦！
投稿讀者：W.C Wong