愚人節玩大咗！同事個friend好玩唔玩，走去同男朋友講自己有咗，最後搞到鬧交收場，而家仲蘊釀分手，何必呢！
嗰個女仔本來只係想開個小玩笑，同時想聽一啲sweet sweet嘅答案，例如：「有咗咪有咗囉！我哋結婚啦！」佢諗住聽到呢類說話就心滿意足，點知男朋友完全get唔到係愚人節，即刻轉咗認真mode答：「我唔會要囉！都唔知係咪我經手。」
佢男友仲加多句：「落咗佢啦，我唔想食死貓，亦唔想咁後生結婚。」
個女仔話自己最在意係「唔知邊個經手」呢句，隨即著晒火同男友開拖，聽講當時仲未講係愚人節玩笑，兩條友真係就住個「BB」嘅議題喺度爭執，男方愈講愈過份，摷返晒個女仔之前同朋友落bar飲嘢嘅事嚟講，又話個女仔其他男性朋友唔慌好人，一早懷疑佢同人打友誼波。
雖然女方見勢色唔對，最終都講咗係愚人節開玩笑，但你知有時一鬧交就已經傷感情，脾氣發咗，氣氛壞咗，要大家即時當無事攬頭攬頸唔係咁易，因為嘈交嘅時候暴露晒最歇斯底里嘅醜態。
女方冷靜後覺得呢個男朋友唔可靠，一來不負責任，二來諗到佢私生活好open，三來講說話好絕，將來如果真係結婚生仔，唔知可唔可以倚靠對方，又話開一個玩笑之後，先了解自己喺男朋友心目中係咁cheap咁唔正經。
男方亦拒絕認錯，佢話冇理由用呢啲嘢講笑，如果嬲佢講嘅說話太hurt人，佢都要嬲個女仔唔識分輕重，竟然用有咗BB呢件事嚟玩。
我問同事：「咁你個friend而家點？」
同事：「好似講分手，但唔知最後分唔分得成，可能轉頭又好返。」
我：「算啦，人哋嘅感情事，旁觀者都係唔好畀咁多意見，如果佢哋真係分手，介紹佢哋嚟Speed Dating啦，又多兩個客。」
同事：「都好，我下星期再follow up」