「痴線！日日要人排隊入會議室做檢測，唔中招都變中啦！同埋有冇咁低B呀？如果個同事返嚟check完先至知道中咗，咁呢度已經個個都有事，點解唔信啲staff呢？覺得我哋喺屋企test完先返工會做假呀？老細啲思維真係……」
有位就快過試用期嘅同事好不滿公司嘅檢測安排，係咁鬧措施反智，正當佢想鬧埋老細嘅時候，我即刻stop咗佢，借啲意叫呢位同事幫手做第二啲嘢，免得佢禍從口出，因為相同嘅錯，我當年都犯過……
嗰位同事鬧公司鬧老細嘅時候，Zuki都喺度，呢個女人係Admin，佢鍾意咗老細好多年，「巔峰之作」係幾年前有一次公司gathering，夜晚出咗尖沙咀嗰啲酒吧食飯飲酒，Zuki唔知真醉定係假醉，臨尾伏落老細度，賴死要老細送佢返屋企，全程喺條街攬住老細。
嗰鑊嘢Zuki應該豁咗出去㗎喇，因為走嘅時候其實仲有7至8位同事在場，包括我，佢可以做到完全唔理大家嘅眼光盡地一煲，可惜吖，神女有心，襄王無夢，雖然佢好似隻樹熊咁死攬住老細，不過老細為避嫌就搵多兩個同事上車，可能老細都驚Zuki姦咗佢🤣點都要有人證在場，有咩事上到庭都冇咁驚吖嘛！
其實就算出事，Zuki都唔會告老細啦，純粹講笑啫，因為老細咁抗拒單獨送佢返屋企，Zuki唔單止冇嬲同埋冇灰心，隔咗幾日（因為飲酒當晚係星期五）返到公司仲係咁讚老細係正人君子，總之老細喺佢心目中係零瑕疵零缺點。
Zuki：「我覺得Steve真係好正氣，講真一個女仔出去飲嘢如果醉咗，喺酒吧肯定好多狗公埋身，Steve完全唔係嗰種人，呢啲男人有定力，將來會係一個好老公。」
其實會唔會唔關定力事，係你唔夠吸引力咋……
客觀啲講，Zuki又唔算好差嘅，30幾歲中女嚟講係keep得唔錯，瘦底得嚟上圍都幾豐滿，有冇出「古惑」加pad就唔知啦，唔係天姿國色，但都唔係豬扒，極其量你可以稱佢為痴女囉，淨係對住老細先會咁痴。
而老細就40幾歲啦，算係年輕才俊，大隻，不過衰在矮，以男仔角度屬於矮，約168至170左右，以女仔角度都可以啦，高過Zuki，而公司班男仔普遍都高，我自己180，office仲有人高過我，所以老細喺公司班仔裡面係最矮，但亦都係最大隻，當然亦係最有錢啦！個樣仲有少少似林文龍，呢個package夠殺㗎喇！
試問邊個打工仔茶餘飯後唔會講下公司或者老闆壞話吖，當時我入嚟做冇幾耐已經會同同事呻，我仲記得自己呻乜：「妖，公司啲廁紙cheap到爆，鞋過我腳板底，咁抹法屁股都損啦，使唔使慳嗰一個幾毫呀？老細自己唔屙屎㗎？」
當時有個同事好好心咁幫我轉話題，因為個同事做得比我耐，佢見到Zuki都喺度聽住，所以就即刻幫我解圍，情形就好似我今時今日Stop嗰位就過試用期嘅新人講公司壞話一樣，Zuki聽到唔止會嬲同埋鬧返你轉頭（護主犬係咁上下啦），仲會同返老細講㗎！
我都幾肯定當年Zuki有報寸，因為公司過咗幾日，係幾日咋，已經全面換晒廁所啲廁紙，之前用咗好多年喎，我講完冇幾耐就轉？呢個巧合會唔會太巧合呀？所以同事到而家都話我係革命戰士，捨身為成班人爭取到換高級廁紙嘅福利。
而我呢？就為咗投訴廁紙問題而付出沉重代價，嗰次臨近一年一度人工調整，自問做嘢ok，但我係成個department加得最少，因為我哋自己部門嘅人工好透明，同事間會互相交流，有個成日請假做嘢又hea嘅人都加得多過我，你話唔係老細收到風我話佢孤寒？邊個信呀？連department head都有提我小心講嘢，咁知咩事啦！
Zuki鍾意老細都鍾意到出晒面㗎喇，飲醉酒事件固然精彩啦，平時仲會成日入老細房傾計，有啲場面好搞笑，Zuki入房會閂門，隔一陣老細就會行出嚟開返度門先入返去坐，好明顯係唔想其他同事估估下或者有錯覺。
同事嗌Tea，Zuki自己未揀食乜已經飛奔入老細房問想食乜嘢，外賣嚟到又會撥開大家嘅食物，淨係搶老細嗰盒然後負責拎入房，得啦得啦，邊個同你爭呀，如果唔係個個都知佢傾慕老細，真係會覺得佢似擦鞋，但係Zuki真係愛得太出面喇，絕對唔係出於擦鞋，係真愛呀！Zuki仲曾經講過：「公司唔出糧都會照做，因為太愛呢度喇！」
照邏輯推論，如果咁都唔係鍾意老細，就一定係鬼上身無誤。
Zuki仲會自家製蛋糕同埋煲湯拎返嚟畀老細品嚐，其他人冇呢個口福㗎，得老細咁幸運㗎咋，總之Zuki就想高調，好似啲狗仔出街屙尿喺啲燈柱霸地盤咁，而老細就睇得出想迴避，唔知係完全冇意思吖，睇唔上Zuki吖，定係唔想喺公司搞下屬喇🤷🏻♂️
最新消息係，鬧公司做檢測安排好低能嗰位新人，啱啱被告知要extend probation多一個月🙈我哋已經私下提咗佢唔好再禍從口出，你喺度做嘢可以好hea，但唔可以講公司同老細壞話，特別係Zuki在場嘅時候，隔牆有耳，影響前途呀！