喺東京約咗人出嚟開會，地點係一間上樓嘅cafe，而我嘅身份係客，好在同同事早咗到，因為隔籬枱嗰兩個女仔都幾靚，其中一個仲好似壇蜜，不過坐低一陣就見到有兩個西裝友行埋嚟，冇錯，就係我哋約好咗見面嘅人。
例牌嗰幾句客氣嘅招呼做開場白，企起身交換完卡片又坐返低，然後對方高級啲嗰個無端端發火，用好急促同埋大聲嘅語氣斥責佢下屬，因為都幾突然，當場唔止嚇親我，仲嚇親隔籬枱唔關事嘅壇蜜小姐，而我完全唔知道發生咩事。
由於個高級職員一輪咀鬧佢下屬，呢度都成分鐘，我嘅日文又未好到句句聽得明，對方又講得好快，所以我忍唔住問同事咩情況。
同事細細聲答我：「鬧緊個下屬交換卡片次序同埋坐錯位，一陣再慢慢同你解釋。」
個下屬全程耍冧，高級職員好兇狠咁鬧完佢之後，即刻變臉向我講對唔住，呢句我識聽，而且高級職員對住我講嘢嘅語速明顯係慢啲，如果你問我有咩感覺，其實除咗覺得佢虛偽之外，仲覺得好失禮，或者對方係想顯示自己好嚴謹同埋重視我呢個客啦！
撇開日本同香港職場文化差異，淨係講管理，我絕對唔會公開咁樣鬧員工，1）會傷害員工自尊心；2）呢種作風其實對公司嘅形象都唔好；3）人哋打份工，絕對有權東家唔打打西家，無需要搞到有積怨。
如果咁講係咪永遠唔可以鬧員工或者糾正下屬嘅錯誤？唔係！你可以私底下同佢講同佢傾，甚至私底下先至指責，咁樣對方會比較容易聽得入耳，問下自己嘅出發點係要公開奚落同事，定係真心想佢改善。
Anyway，開完個會，大家一齊搭返電梯落樓，最後喺cafe樓下道別，高級職員又鬧個下屬，今次衰咩呢？原來係衰臨尾對住我個鞠躬唔夠30度……
喺日本鞠躬要分度數，15度鞠躬屬於普通問候，用嚟打招呼；30度鞠躬就表示敬意，對客對同事就係咁，視線要望對方嘅胸同肚之間嘅位置，男仔鞠躬同女仔鞠躬嘅時候，雙手嘅擺位亦有講究，男嘅放兩邊垂直，女嘅要左手疊右手放前面；45度鞠躬就係表達最深切嘅感謝或者致歉。
臨尾佢哋仲要keep住望實我哋走，又係一種禮儀，直至我同同事步入JR站內，而我因為好奇，又折返想裝下個高級職員係咪純粹擺姿態，點知畀我見到佢仲喺街訓斥緊個下屬，而個下屬就喺大街大巷向個上司鞠躬，至於係幾多度我就唔知，因為冇量角尺喺身。
同事：「佢頭先向我哋鞠躬唔夠30度，所以畀人鬧。」
我：「呢個聽得明，反而係一開始嗰陣鬧咩？」
同事：「一開始佢下屬衰咗兩樣嘢，先講交換卡片。喺日本職場交換卡片好講究，遞卡片嘅位置應該要喺你對手嘅水平以下，正話見佢同你交換卡片嘅時候，大家雙手都一樣高度。」
我：「咁坐錯位又係咩一回事？」
同事：「日本有分上下座，佢類似鬧個下屬冇大冇細。」
我：「關愛座我就知，咩係上下座？」
同事：「上下座分好多唔同場合，用喺家庭方面嘅上座就要畀長輩或者客人坐，下座係晚輩坐，職場嘅上下座就睇地方，會議室、搭電梯，仲有出去飲嘢食飯都有分，你唔會想知㗎喇，都唔會想跟㗎喇。
我：「有冇得簡單啲解釋？」
同事：「總之最外面嘅位就係普通職員坐，如果係最外面個位再加埋近門口，就係茄喱啡中嘅茄喱啡坐，你諗返頭先個情況，下屬坐咗入去，高級嗰個坐出面，側邊係門口，咁你明白點解會無啦啦扯火啦！」
聽完除咗笑而不語之外，都唔知講咩好，我冇嘢補充。