「搞錯呀！係咪friend嚟㗎？走都唔講聲，電話又唔聽，就算唔當我哋係朋友呀，大家都做咗4年同事啦，使唔使咁呀？」隔籬部門嘅Jacqueline同另一位女同事呻咗成朝，搞到我都忍唔住行埋去問下發生咩事。
另一位女同事Elsa都喺度呻：「Dorothy囉！今朝辭咗職，係HR話畀我哋聽咋，突然打返嚟話賠錢走，從來冇聽過佢想唔做或者打算轉工，唉！心淡呀！知唔知份報價單擺咗去邊？又冇講低，打畀佢又冇聽，而家都唔知點！」
其實我同Dorothy平時都有兩句，呢個女仔好nice，又順得人，雖然我好想知道佢發生咩事，但我相信Dorothy選擇不辭而別，應該係有自己嘅原因，既然close到好似Jacqueline同Elsa打去都唔聽，我亦無謂喺呢個時候打去問長問短啦！
Jacqueline同Elsa連續呻咗幾日，逢人就講一次，個個都覺得Dorothy好古怪同埋不能理解，而呢兩位女同事由於想搵返份報價單出嚟方便工作，又不得不keep住call Dorothy：「佢應該block咗我哋囉，WhatsApp得一個剔又冇頭像。」
因為涉及公事，加上呢一part我都要參與，所以就自告奮勇試下搵Dorothy，我用WhatsApp，有頭像有兩個藍剔喎，即係正常啦！
我：「Hi Dorothy，唔好意思呀，關於XX客張報價單，因為我要同Jacqueline夾，但係佢哋話搵唔到你擺喺邊，抱歉打擾你。」
應該過咗唔夠兩分鐘，Dorothy已經覆返我：「唔緊要，上星期我已經cc畀Jacqueline，麻煩你叫佢試下search delicate呢個字吖，我記得個email heading有呢個字，可能佢search咗客嘅公司名。」
由於我本身同Dorothy有兩句，而且見佢又保持住一貫咁nice去幫我解決難題，所以就膽粗粗問咗句：「其實你做咩走得咁突然既？Jacqueline同Elsa又話搵唔到你，講唔講得原因？如果唔想講唔緊要，我都係問下，同埋擔心你有咩事。」
Dorothy猶豫咗幾秒：「或者係我小器啫。」
我：「如果唔想講就由佢啦，每個人都有自己嘅諗法，我明既。」
Dorothy：「唔緊要，知你關心我啫，我都想講出嚟，想聽下你係咪覺得我小器。」
原來呢4年以嚟，Jacqueline同Elsa都經常取笑Dorothy似賓妹，佢哋真係用呢個字眼。
Dorothy：「有次放工同佢哋一齊經過商場，佢哋叫我唔好入舖頭，似賓妹跟住主人去睇衫，又話我同佢哋屋企個工人好似，搞到喺office成日想叫我去掃地同洗廁所，仲有好多好多例子，講唔晒，前兩個星期我同Elsa見客，佢可能同個客好熟，一坐低就同人介紹我係佢嘅賓妹，跟住就話講笑，個客都唔知畀咩反應，我就更加要尷尬地陪笑，同埋佢兩個長期扮以前江欣燕做Maria嘅口音喺我面前講嘢……我係咪好小器？」
我：「唔係，我記得有一次成班人食飯，星期五嚟嘅，大家講緊weekend有咩節目，Jacqueline代你搶答，佢話你放假就會去皇后像廣場搵同鄉，又有一次Elsa話灣仔啲酒吧有菲律賓女仔撩啲鬼佬，係咁追住問你係咪其中一個。」
首先，「賓妹」呢個詞語其實有貶意，我都唔會叫自己屋企個工人姐姐做賓妹，無論對外同對內都唔會，其次，Dorothy係純正香港人，佢只不過係皮膚黑啲，所以就一直畀Jacqueline同Elsa「賓妹前賓妹後」咁樣稱呼同講笑，皇后像廣場同埋酒吧呢兩次我都係親耳喺現場聽到。
Dorothy：「係咪覺得我好奇怪？畀佢哋咁樣叫足4年，開玩笑開足4年，突然間爆發決定辭工同絕交。」
我：「咁每個人都有自己嘅底線嘅，唔會奇怪，聽你咁講，應該係兩星期前見客單嘢引爆咗你，不過我都想同你講，有時做人係咁，你太易話為，又冇乜所謂，對方未必會覺得你好或者nice，更多時候會認為你好蝦，一直食住上攞你嚟講笑。」
Dorothy：「嗯，所以我最初冇出聲，其實自己都有責任，不過我有新工喇，新環境我唔會再咁樣。」
我：「識得保護自己梗係好啦，再問多你一條問題，如果佢兩個問起，你想唔想我講個真實原因出嚟，覺得慚愧嘅應該係佢哋，唔應該係你。」
Dorothy冇明確答我得定唔得，反而認為Jacqueline同Elsa唔會覺得自己有問題。第二日返到公司，我先交代咗份報價單一早有cc畀Jacqueline。
Jacqueline：「係喎，有喎，喂，咁但係Dorothy搞咩呀，電話又唔聽，WhatsApp又block我同Elsa，你又唔block，賓妹真係特別麻煩，我屋企嗰個又係咁。」
Elsa：「咪係囉，似到十足十，辭工又唔講清楚咩事，係咪趕住飛返去菲律賓呀？」
我：「個問題咪就係你兩個成日用佢嚟開玩笑囉！」將Dorothy同我講嘅心路歷程一五一十講晒出嚟，仲以為佢兩個會內疚甚至叫我轉達一聲對唔住，原來咁諗實在太天真喇，反而Dorothy講中咗。
Elsa：「講笑咋喎！咁都嬲呀？都唔係第一日叫佢賓妹啦！以前又唔出聲！」
雖然唔關我事，不過我都想幫Dorothy平反：「人哋一直唔出聲，係因為有修養，但係你兩個就食住上，其實私底下佢當你哋係friend又唔計較，點知喺個客面前都要拎嚟開玩笑。」
Jacqueline：「佢小器就小器啦！」
現實中真係有好多人唔會反省自己，永遠覺得個問題喺別人身上，同埋你做得太耐好人，一直啞忍接受，原來係唔會得到體諒，反而會怪你點解受咗咁多次，嚟到今次先至有咁大反應。
冇義務教好Jacqueline同Elsa，價值觀同埋待人接物亦唔係三言兩語可以改變，不過Dorothy嘅經歷就警醒咗我自己，唔鍾意一定要出聲，千祈唔好慣，在此希望Dorothy經一事長一智，喺新公司有更好發展，同時識到一班唔會用佢嚟開玩笑嘅新同事。