恐怖男Headhunt

廣告都未試過叫你哋share,不過今次希望每個睇到呢個post嘅人都share出去,因為事態嚴重,需要有更多人知道。

我收到一個女讀者嘅message,佢喺Telegram一個求職谷入面識咗個男headhunt,對方問佢攞CV仲堅持要有相,呢樣未算仆街,原來喺呢個求職谷入面已經有女仔中過招,更加公開爆大鑊,嗰位男headhunt喺見工嗰陣,即場叫啲女仔換黑色絲襪影相,有女求職者聽到唔對路就起身走人,據稱好多女仔唔敢報案或搞大件事,因為有CV喺對方手上,有齊個人資料。

個男headhunt恐怖在於喺whatsapp同女求職者講嘢時好正常,去到佢公司見工先至現形。我明白亦尊重有受害嘅女仔現階段唔想公開資料住,亦好感謝呢位讀者講畀我知,等其他求職者提高警覺性,不過喺呢度好想強調幾點:

1)見工前盡量同家人或者朋友講,等佢哋知道你幾點見工?喺咩地方見工?有起事上嚟佢哋都可以報警或者搵你。

2)如果遇到唔合理要求,例如呢啲即場換衫著絲襪嘅例子,絕對唔好猶豫,要即刻走人,唔排除對方公司已經裝咗偷拍鏡頭。

3)若然其他女仔有相同遭遇,希望你哋可以向警方舉報,或者聯絡我幫你。

4)多一個人講出嚟指證呢啲敗類,就會少一個人受害。

5)CV唔好亂send出去,要確定對方公司同埋身份,多啲上網做資料搜集,甚至去Linkedin check下對方咩來歷,正當嘅headhunter都會喺Linkedin公開個人資料,絕對唔會收收埋埋,因為佢都要靠open profile去挖角同埋搵人。

請廣傳,等多啲女士知道呢件事,見工時提高警覺性。

error: