幾經辛苦搵到工 點知人哋Work fom Home

其實我由上年8月開始搵工,搵到今年1月終於有回音,去咗1st interview,過多陣人哋仲安排2nd in,當時疫情開始再緊張,搞到第二round要臨時改做視像進行,慶幸對方都滿意我嘅表現,大家仲約略傾過搵一日上去正式簽約。

嗰間公司話有位同事3月會離職,希望我農曆新年後返工,預少少時間交接,詳細就簽約時再傾,我梗係開心啦,可以嘅話仲想即刻返工,不過當時真係好近新年,都明白人哋想我過埋年假先正式開始,以為守得雲開見月明,點知竟然係另一輪嘅煎熬。

距離上去簽約仲有幾日,間公司打嚟話要改期,原因係有同事確診,而家全部人work from home,等如提早咗放農曆新年假,我都唔知係好彩定唔好彩,如果一早上去簽約甚至返工,可能連我都已經確診埋,始終屋企有個一歲嘅BB,點會唔擔心吖,我係大人唔怕,怕有咩事惹到小朋友啫。

有小朋友之後開支大咗好多,老婆生完亦都冇工作,屋企就靠我一個經濟支柱,如果唔係舊公司上年大裁員,一炒就炒咗廿幾人,我絕對唔會喺呢個艱難時期走去搵工,因為預咗個市一定唔好,而事實的確係咁。

嗰間公司算好有交帶,特登打畀我講老細下令各同事在家工作直至另行通知,由於冇歸期,而當時2nd in又係視像,莫講話未簽任何合約,佢哋連我嘅學歷同工作證明文件都未影印,其實咁做係啱,請咗先copy都係想保障求職者,偏偏又遇到呢個浪。

疫情愈演愈烈,好多公司已經work from home,身邊啲朋友大部分都home office,條街明顯少咗好多人,只係冇諗過沒完沒了,當你睇住政府發放嗰啲確診數字每日萬萬聲,可以預期work from home呢個趨勢暫時仲會延續。

隨住個疫情咁多不穩定性,出面嘅job已經少咗,你肯馬死落地行都未必有路行,餐飲業冇晚市,好多舖頭又閂門,服務業僧多粥少,有考慮過揸Uber,但有朋友做緊,佢話而家個市好靜,有時個幾鐘都冇一張order,所以我就算乜都肯做,都唔代表有得做。

而家新公司個位hold住都唔知點算,期間個HR有打嚟同我傾,因為政府透露過三月底左右有限度禁足,所以老細預咗停到全民強檢之後先返office,由於我真係未簽約未開始,當時雖然口頭話請,不過連確實日期同詳情亦未有,唉!

明白唔怪得嗰間新公司,佢哋都唔想咁樣,只係我由上年8月開始已經冇工開,慶幸有啲積蓄頂住,但長遠一定坐食山崩,就算再出去搵嘢做,呢期都預咗冇得in,而家喺屋企望住老婆同個仔,開始覺得自己有抑鬱,不過唔想老婆擔心先盡量唔表現出嚟。

最近send CV完全冇回音,我都分唔清係自己唔夠料,定係啲公司work from home未有機會約見,幾廿歲人先嚟失業,再加埋咁嘅環境,灰到唔知講咩好,甚至覺得自己唔會有搵到工嘅一日……

error: