上星期公司有內部傳聞會減薪，同事間亦都私下不斷討論，有人覺得好唔開心，但係都有人認為呢個時勢唔炒魷就算，減少少可以接受喎，大家仲喺度研究減幾多係底線，嗰種灰沉沉嘅氣氛真係令人吃不消。
過多幾日，呢個傳聞終於成真，HR強調自己只係傳聲筒，佢聽到嘅時候都好嬲，因為老細話要減人工嘅理由好牽強：「呢段時間同事以work from home為主，未來兩三個月相信都唔會變，加上政府嘅禁足強檢令事在必行，相信各位未來嘅返工成本會大大降低，至少慳咗交通費，所以公司希望喺呢個時期進行減薪，相信大家嘅支出同收入拉上補下，唔會有太大影響。」
同事們睇完呢段文字之後得兩個反應，首先好嬲，然後就覺得公司好蠢，減人工可以搵無限個藉口，但你話work from home慳咗車錢，返工成本低咗，所以減人工係唔會有太大影響？呢個係咩邏輯呀？
有個火爆嘅同事直接Email老細，講明唔會接受減薪，仲話如果真係咁計，公司呢段時間都慳唔少燈油火蠟，唔止電費，就連影印機嘅紙同碳粉、Pantry嘅茶包、蒸餾水，甚至係外判每日去office裡面做清潔嘅姐姐都cut埋，理論上營運成本低咗好多，咁點解唔係調返轉加人工呀？
老細冇回覆呢位同事嘅電郵，反而再搵HR做醜人，強調呢個只係諮詢，唔係硬性要減，想聽下大家嘅反應同意見喎！你都忽根，打工仔會唔會贊成呀？後來得悉仲有幾個senior都表示對work from home要減薪感到不滿，我哋懷疑老細見勢色不對，即刻改口風緩和氣氛，根本一開始係order，唔係option，唔好扮嘢啦！
老實講，在家工作唔代表輕鬆，困喺屋企嘅細小空間做嘢，有時做到幾多點都唔知，lunch hour更加唔會好似平時收工咁，可以出去行下或者同人吹水，過咗6點仲繼續做，因為home同office已經分唔開，唔通員工嘅付出又可以漠視咩？
雖然在家工作減薪呢單嘢直至目前為止都未執行，但係佢用呢個理由試探減人工嘅時候，好多同事聽到已經覺得心淡，亦都覺得好心寒，明白呢一刻都係要繼續做，不過遲早要諗下條路點行。
其實老細話生意唔好要減薪或者cut人仲講得通，但你話work from home令返工成本降低，人工就要隨之而降低，呢下先係同事心灰意冷嘅致命傷，咁唔通將來請人嘅時候，住得近車費平啲，人工就要低啲咁呀？有時真係唔明呢啲公司同老細諗乜。