「知唔知老闆幾時返呀？打佢手提又冇人聽，WhatsApp咗佢又已讀不回，我有急事想搵佢呀，你幫手同佢講聲吖，睇下今日之內可唔可以同佢傾兩句。」打嚟同我講一大輪嘢嘅係劉生，office啲同事以前都係咁樣稱呼佢。
劉生之前係公司其中一個部門嘅經理，走咗兩個月㗎喇，reference letter明明喺佢last day嘅時候出埋，糧又計到足，應該冇嘢爭佢吖，所以最初我都諗唔明劉生點解搵得老闆咁急，唔通係新公司嗰度有生意益我哋？
我：「你搵老闆咩事啫？係咪我哋有啲咩畀漏咗？稅單嗰啲呀？」
劉生：「唔係唔係，我想返嚟做，想親自同老闆傾。」
我：「返嚟做？你個位我哋請咗人喇喎！」
劉生：「我知，有舊同事已經同我講咗，女人嚟㗎嘛，呢啲我知㗎喇。」
我：「唔係女人定男人嘅問題呀，而家係請咗人代你個位。」
劉生：「咁佢過咗試用期未吖？三個月都未夠啦！」仲要躁返我轉頭，你走咗喇喎，乜咁大官威呀？
講返個前因先，三個月前劉生話LinkedIn有headhunt撬佢跳槽，向公司提出辭職，老闆諗住多一事不如少一事，提議加薪希望劉生可以留低繼續做，我唔知佢當時同老闆喺房傾成點，只係知道劉生出返嚟嘅時候同我講過幾句說話：「你老闆都傻傻地，加薪喎！Headhunt搵我去嗰邊福利好，規模又大，寫字樓都係甲級……係喇，想問下你reference letter可唔可以提早畀我？」
其實劉生個position如果辭職要兩個月通知，不過老闆見佢咁急，所以好人到畀劉生一個月通知就走得。
據我所知，最後一個月嘅時候，老闆仲搵劉生傾咗幾次計，希望佢可以回心轉意，畢竟走咗個經理又要重新請人都幾麻煩，但係劉生仲係堅持要走，最後嗰個禮拜仲請咗4日病假，last day當日先返嚟搞埋啲手續同埋拎reference letter。
幸運嘅係，我哋請人比想像中順利，可能因為疫情嘅緣故，出面position少，candidate就幾多，收咗啲CV返嚟都好理想，結果劉生離開咗公司唔夠一個星期已經請到人，呢個replacement仲要做得好好，雙方都十分滿意。
鏡頭一轉老闆見完客返到公司，我同老闆講劉生搵得佢好急。
我：「劉生話想返嚟做喎，想你覆返佢。」
老闆：「我知，我見緊客嘅時候佢係咁打嚟，後來我聽咗佢電話喇。」
我：「咁你真係請返佢呀？」
老闆：「傻啦，Elsa做得咁好，唔通唔要Elsa再請返劉生咩！」Elsa就係新請返嚟代替劉生個新經理。
我：「頭先我有同劉生講已經請咗人，佢反問我個新經理過咗試用期未？我都唔識點答佢。」
老闆：「佢都有問我呀，仲叫我炒咗嗰個人，畀佢返嚟做。」
我：「唔係啩，指揮你炒人添呀？即係佢搵食就冇問題，打爛人哋個飯碗都唔緊要？好自私喎！」
老闆：「係有啲搞笑，劉生仲話肯減人工返嚟做，6萬減到4萬都肯制，我答咗佢喇，話我第一個月已經畀新經理提早過試用期，如果要炒人請返佢，咁樣公司就要賠兩個月人工，然後劉生先至冇再講落去，搭個下台階啫，無謂大家尷尬啦！」
唔係喎！我覺得劉生應該好尷尬喇喎！
當時老闆真係唔止一次挽留，直至劉生最後一個星期請咗4日假先至死心，老闆仁至義盡㗎喇，係你玩爛個遊戲先，而家又叫我哋炒咗個replacement，仲不惜降薪兩萬蚊都要返嚟，好在佢聽到公司要賠兩個月人工識得自己收皮咋。
劉生當時6萬，佢應該預計到replace佢個經理係差唔多人工，其實Elsa又真係月薪6萬，同佢一模一樣，假設公司真係畀Elsa過咗試用期，解僱就要賠兩個月通知金即係12萬，係咪劉生你私人出先？斷估佢都唔會貼錢打工啦！
聽返老闆講，劉生去到新公司之後發覺不似預期，工作好棘手，同事又唔友善，仲話佢個title名存實亡，上面仲有個人lead住自己，好似迫緊佢走，覺得成件事係畀headhunt呃咗，總之就捱唔住已經準備辭職。
不過你辭職還辭職，冇理由叫我哋炒個人然後請你返嚟吖，6萬人工減到4萬，你返嚟做都唔知懷住咩心態啦！
老闆：「順便出封信畀Elsa講提早過試用期啦，打完畀我簽名。」
我：「好！」
呢樣嘢我都幾欣賞老闆，雖然試用期一般係三個月，但如果人選適合，其實唔使拘泥於傳統操作，嗱嗱臨出信先，費事夜長夢多，一陣劉生又搞事。