招聘廣告雖然日日有，但我發覺有啲公司根本唔係真心請人，最近見咗份工正正就係咁，上到去係咁問我而家啲客嘅資料，狼到想要埋個client base咁滯，仲借意叫我寫個sales plan，諗起都激氣。
當日上去有一男一女in我，態度係友善嘅，但係自我介紹完之後，佢哋嘅問題就非常有問題，我都有諗過係咪自己太敏感，不如講出嚟等你評下理。
女：「你而家跟緊邊幾個客？」
我：「德勤, 黃氏, 雅迪，呢啲比較大嘅客都有跟緊。」
男：「仲有呢？講多啲。」
然後呢一男一女真係用支筆喺張白紙度寫低。
女：「咁contact邊個呀？」
我：「Contact邊個？」
男：「係呀，例如德勤你搵邊個傾？黃氏同雅迪嘅contact point係邊個？」
其實聽到呢度我已經覺得唔對路，見工應該係focus我嘅工作能力同埋應對，冇理由問我啲客嘅contact person應該搵邊位，擺到明就係想我提供而家公司嘅client base出嚟，當時我判斷到佢哋有呢個意圖，所以就求其作啲假名。
我：「德勤搵Patrick，黃氏搵Alex，雅迪搵Cindy。」
一路講，呢一男一女就好似學生上堂抄筆記咁，而且仲想要更多客名、資料、contact point等等，我全部老吹奉陪，即管睇下咩葫蘆賣咩藥。嗱！假設你真心請人，呢啲唔重要吖，你唔會私底下contact我啲客㗎嘛，啱唔啱先？
睇住佢哋如獲至寶咁抄我提供嘅流料，內心覺得好嬲又好笑，點知呢場大龍鳳仲未完，佢兩個竟然好意思叫我寫sales plan出嚟，講到明用我而家公司嘅生意額同埋訂單數量去做，不如免費幫你哋做義工好冇？Copy晒我所有database同email record畀你使唔使呀？
冇嘅，你要咁狗，我都可以好狗，全部數字放大，有本事咪跟啲流料去偷客囉，包你死得好慘。
Interview之後兩日，個男嘅打返電話俾我，話想約我2nd in，我話唔會考慮，佢問點解，我照直答因為覺得佢哋唔係真心請人，點估到佢可以厚顏無恥否認，跟住再心急咁問我：「唔好意思，想confirm下德勤係咪搵Patrick？好似冇呢個人。」啱晒，上次當面唔好意思屌柒你，今次隔住個電話我大膽好多，代我問候你阿媽先，再問候你間賤種公司上上下下。
唔好咁冇陰公啦！好多人真心真意去搵工，為見工準備好多嘢，甚至為見工犧牲寶貴嘅一日假，但有啲公司就為咗收集你嘅個人資料，甚至係套行家啲商業機密，然後出個別有用心嘅招聘廣告去釣魚，呢種人真係生仔冇屎忽。
睇嚟大家見工真係好多奇遇，以下呢個都唔弱 😲
《佢請咗我，我而家係HR喇》
https://hkofficedaily.com/?p=10680