相隔兩年，終於可以再返香港，估唔到返自己屋企原來係咁千辛萬苦，又驚驗到陽性冇得走，又怕觸及熔斷機制，所以飛之前成個禮拜都提心吊膽，因為有咩事要改機票再夾埋book酒店真係好煩，好在最後都順利登機，而家入住緊檢疫酒店，7日後就自由喇，第一件事當然係同父母食飯啦！
不經不覺出嚟社會做嘢已經第10個年頭，記得初入職場嘅時候……我係唔想咁快入職場，因為好鍾意旅行，其實想玩多陣先搵工，仲同班同學仔約好一齊去東歐，甚至考慮過去Working Holiday，但係爸爸因為工作關係整傷右手嘅神經，要停工一段長時間，屋企頓失經濟支柱，促使我畢業後要即刻搵嘢做。
我爸爸嗰一輩唔興買保險，佢份散工嘅僱主又好無賴，總之就搞到好頭痕，不幸中之大幸係我好快搵到工，雖然份糧主要用喺屋企同埋爸爸嘅醫療費用，但總算唔使求人，唔使周圍借，咁樣已經好好㗎喇！
為咗節省生活成本，基本上lunch我只食麵包，餓就唔會餓親嘅，後生仔冇咁講究，好又一餐，唔好又一餐，最介懷只係冇正常社交啫，例如同事結伴食飯，我一個星期最多join一日，慳錢吖嘛，冇乜機會同人交流，自然就會少啲朋友，而同期畢業嘅同學好多都仲未開始搵工，有幾個更加組團去歐洲旅行，當時年紀輕輕嘅我又點會唔羨慕吖！
爸爸嘅傷患問題比預期中嚴重，有見及此，我特登搵多份兼職，喺一間高級日本餐廳工作，其實時薪唔算高，但每個月多幾千蚊都係錢，講真體力上並唔算辛苦，但精神上就比較攰，朝9晚6返文職，跟住7點至11點做侍應，星期六日返全日（日本餐廳嗰份），鐵人都死啦！
慢慢地，我都習慣咗打兩份工嘅節奏，直至有一日返餐廳做兼職，眼前出現咗一張熟悉嘅面孔，當時我已經捧住隻刺身船準備放低，望一望先睇清楚，呢位客人就係我日頭份工嘅同事，嚴格嚟講唔應該叫同事，佢係高層，平時大家都叫佢做譚生，年約60歲，年紀大過老細，地位係老細之下就到佢，連我阿頭都要叫佢做老頂。
入職嘅時候，HR講解過合約有一項條款，就係唔可以做兼職，所有副業或者freelance都要申報，我見到譚生嘅時候就係驚緊呢樣嘢，如果為咗份幾千蚊嘅兼職侍應，搞到冇咗份萬幾蚊又冇乜OT嘅正職，咁真係有啲唔抵，而且我仲好憂慮屋企嘅經濟狀況。
我硬住頭皮行埋嗰幾步擺低隻刺身船：「Hello，譚生，咁啱嘅……」
譚生：「喺度兼職呀？」
我以苦笑遮掩尷尬：「係呀。」
始終係憶述返10年前嘅情景，有好多細節同對話已經忘記，只記得我好驚，唔知點兜，其實都冇得兜，唔通話路過咩……
當時譚生若無其事，仲向我介紹身邊嘅人係佢太太，我禮貌地打招呼示好，然後就繼續做嘢，我向餐廳老細講撞到正職公司嘅高層，希望可以負責另一邊嘅Area，唔想一直捧食物過去，好在餐廳老細冇問題，將我同另一位侍應交換位置。
我一路做嘢一路留意譚生，真係好唔聚財，講到尾都係自己心虛，後來見到佢埋單，我亦特登行埋去講拜拜，點都好啦，斷正已成事實，無謂鬼鬼祟祟，印象中我嗰陣仲講咗句：「唔好意思呀譚生。」潛台詞應該係唔好意思，呃住公司做兼職。
譚生：「你做嘢先啦，返公司先講。」呢句真係……返公司講咩先？
雖然隔咗咁多年，但我仲記得嗰晚真係瞓唔著，好驚冇咗份正職，又諗起阿爸隻手仲有排唞，由細到大我都好少失眠，一躂落床永遠秒速瞓著，特別係身兼兩職之後，返到屋企特別攰，但嗰晚例外，望住個天花板喺度諗第二日點面對，究竟向阿頭自首好唔好呢？譚生係我阿頭嘅老頂，我又冇理由越級走去搵佢吖。
第二日返到公司驚咗成朝，唔覺阿頭或者譚生有咩動靜，咁樣先至係最折磨，直到lunch time我食緊三文治，譚生先至走埋嚟問：「冇出去食飯咩？」
我：「冇呀，譚生係咪搵我？」再拖落去都唔係辦法，我嘗試主動啲，要劏要殺要炒就快啲，唔使一直心掛掛。
譚生：「以為你出咗去食飯，仲諗住lunch time之後先搵你傾，你食埋個三文治入嚟我房吖。」
我：「我食完㗎喇，而家ok！」邊有心情食吖……
入到房之後我即刻道歉，但係譚生話唔需要，仲表示合約當中唔畀同事兼職嘅條款，主要係針對同一個行業，怕有利益衝突，所以喺餐廳做侍應並冇抵觸，不過公司立場都驚同事太攰處理唔到公事，最緊要唔好影響平時做嘢。
譚生：「其實撞見你做侍應之後，我反而覺得內疚，喺度諗公司嘅待遇係咪唔好呢，我都後生過，我都試過打兩份工，其實真係好辛苦，你日頭一份夜晚一份，夠唔夠時間休息？」
聽到佢咁講，我起初係愕然，亦搞唔清係咪「老江湖」嘅講嘢方式，但為咗表達自己咁做唔係貪得意，亦唔想因為當中有誤會而冇咗份工，所以就約略講咗爸爸嘅事出嚟。
譚生真係冇秋後算帳，換言之佢對我嘅體恤，仲有話反思公司待遇係咪唔夠好嘅說話都係真心，不過沒有最感動，只有更感動，後來譚生做咗一件事，令我到今時今日仲心懷感激。（未完待續）