同Sherming一齊住嗰幾日，我哋每晚都會約埋做一件事，就係快速測試，Sherming嘅原意係密切接觸者始終要小心啲，唔想連累到我，而我為咗令佢安心所以就test埋，過多幾日大家都冇事，咁咪唔使再分開食飯囉，話唔定可以攬住瞓…… 講笑啫！
相信我喺Sherming心目中都係正人君子，起碼平時喺公司正正經經，記得有次大家放工搭同一架巴士，個傻妹途中恰著咗，不自覺挨落我膊頭仲要流咗少少口水，我郁都唔敢郁呀，怕嘈醒佢吖嘛，而Sherming今次搬嚟住之前，我亦快手快腳執好間屋，最重要係將用嚟download AV部notebook收埋。
AV呢樣嘢每個男人都有睇㗎啦！冇先至唔正常囉！我分得好開㗎，做嘢用一部notebook，download愛情動作片用另一部，你知啦，好易中毒㗎嘛，公還公私還私比較好，Sherming過嚟當晚我已經將「有料」嗰部notebook擺喺油壓床下面，夠晒穩陣喇啩！
Sherming每晚做完快速測試見到得一條線，都會好開心咁Yeah出嚟，仲作勢攤開雙手要擁抱我，可惜吖，佢話要check多幾日冇事先可以真正攬攬，所以我要忍一忍，其實男女之間最甜蜜可能唔係拍拖，而係戀人未滿曖曖昧昧嘅階段，一切盡在不言中。
我：「做咗6日快速，好安全，聽日第7日，不如我買啲好嘢食返嚟慶祝，今次真係要攬攬。」
Sherming：「好呀！而家行出房就要戴口罩，我都覺得好辛苦，聽日終於可以坐埋一齊食飯，唔使分開。」
咦！唔使分開嘅意思係咪默認大家一齊呀？唔使戴口罩即係可以接吻？
當晚我買多幾盒快速測試，買咗一打新鮮生蠔，屋企有酒，為慶祝Sherming可以除罩，我意思係口罩，高高興興返上樓，春宵一刻值千金，本身想買定一盒condom，但諗諗下實在太邪惡，呢啲嘢隨遇而安啦，唔好諗唔好諗。
我同Sherming就好似啲新婚夫婦咁，用個棒棒check嘅時候真係有種驗孕feel，分別只係個老婆Yeah係因為有咗，而Sherming嗌Yeah就因為一條線冇確診，又溫馨又搞笑，嗱嗱嗱，呢段時間大家應該對深喉有研究㗎啦！
Sherming：「一條線，Yeah!」
我：「即係冇BB，咁我哋要繼續努力喇！」
Sherming：「你個咸濕仔！」
我：「咩呀，講笑之嘛！」
我就係要呢啲對話呀！猶疑在似即若離之間，望不穿這暖昧的眼🎼🎤識唱嘅一齊唱。
Sherming已經除低口罩，佢快測完輪到我，把握時間做實事，我用蠔刀逐隻逐隻蠔咁開，你知唔知蠔裡面嘅鋅被稱為「終極性礦物質」，可以刺激人體嘅性慾㗎！
Sherming：「咦，你兩條線既。」
開緊蠔嘅我即時大驚，喂，係喎，點解既？
我：「會唔會係程序錯咗呀？不如check多次吖。」
當我抬高頭嘅時候，Sherming唔知幾時已經戴返個口罩，同佢平時做嘢嘅工作效率一樣咁快，而我就用顫抖嘅雙手拆開另一個新嘅快速測試盒，由我拎支捧出嚟，自己幫自己深喉，再滴四滴，等出結果，呢十幾分鐘好似一個世紀咁漫長。
全屋都靜晒，氣氛相當凝重，期間Sherming電話響，係佢老豆打嚟話連續兩日做快測都係得返一條線，冇晒事喇！咁我呢？我做完第二次，都仲係兩條線，而家到我有事呀！
Sherming：「你有冇咩唔舒服呀？發燒？喉嚨痛？」
我：「又真係冇喎！你老豆冇事喇？」
Sherming：「係呀，阿媽而家都返緊屋企，咁我都返去喇，你自己小心啲，你要快啲好返呀！」
我：「係……知道。」
愛情故事裡面，條女要離開你有好多原因，冇錢你可以promise佢發奮，做錯事你可以誠懇道歉認錯，但而家係確診，我兩條線佢一條線，逝去感情如何留得住，半點痴情遺留殊不易，更多悽悽慘慘的遭遇，我不知道……
Sherming：「Sorry呀，唔知係咪我惹你呢？」
我：「傻啦，你日日驗都冇中，根本唔關你事，返去先啦，呢度危險呀…」
Sherming：「好，我返到去打畀你，你有咩事要同我講呀！」
我唔捨得Sherming，更加唔捨得佢條熱褲，但我冇資格叫佢留低，真係好嬲自己點解咁唔爭氣，如果Sherming都係兩條線，佢會唔會選擇留低呢？未能同年同月同日生，但願同年同月同日確診，唉！天意！
最後我一個人食晒12隻生蠔，逐漸感受到身體裡面嘅變化，然後默默拉開張油壓床，拎返download AV專用嗰部notebook出嚟，跟住Sherming就打畀我喇。
Sherming：「你點呀？有冇乜嘢病徵？」
我：「暫時未有，你呢幾日都要check下有冇事。」
Sherming：「會喇，你記得早啲休息，唔好咁夜瞓，多謝你收留咗我幾日呀！」
病徵呢樣嘢，而家冇，轉頭會有，一個病咗嘅人食完生蠔睇完AV再自己搞掂，一定有「病精」啦！唔好意思個gag爛咗少少，因為心情好差，體諒下。（完）
未睇上集嘅朋友可以去呢度👇
https://hkofficedaily.com/?p=21027