由於我哋個大佬（上司）之前轉工走咗，所以公司要請返個人，有一日HR姐姐走嚟同我講：「得唔得閒？幫幫手一齊in個人，因為我唔知個candidate係咪真係識，你始終熟啲，係咁易問幾條問題睇下佢有冇料吖！」
我又衰嘅，當時冇諗太多，之前個大佬走咗之後又的確冇乜嘢做，HR姐姐行到埋嚟個樣又急又慌張，咁咪幫下手囉，入到房見見下開始發覺唔多妥當，面前呢個人有機會做我上司㗎喎，由個細嘅走嚟in個大，好似怪怪地。
正常問題問完，呢位candidate都答得好好，而且好有禮貌，全程笑晒口十分之親民，跟住HR姐姐就問佢：「你之前份工係$50,000，呢度未填expected salary，你心目中有冇一個價錢填落去？」
嘩，冇預期之下知道咗佢幾錢人工添，嗰陣雖然唔肯定會唔會請呢個人做我上司，不過咁敏感嘅話題，會唔會等我出返間房先問好啲呀？最慘係間會議室唔算好大，我要離開就要HR企起身讓路，加上突然起身走又好似太突然，HR又冇意識叫我出去先。
「我嘅expected salary係$55,000，因為我已經有一個offer係呢個人工。」
HR：「明白。」明明明，你明咩呀，放我出去先啦，傾人工始終太敏感喇，我又唔係HR，呢啲嘢唔使聽啦！
我忍唔住插嘴：「不如我出出去先。」
HR：「好快完㗎喇，等多陣。」
「另外我想問清楚啲benefits，請問呢度有幾多日大假，個bonus係discretionary bonus定係guarantee？」
你放我走啦屌，我其實唔八卦㗎，呢啲私人嘢你兩個閂埋門慢慢傾吖嘛，又唔係我負責，又唔係我搞，又唔係我話事，你哋迫我一齊聽把托咩！
HR答完佢之後，又繼續發問：「係呢，介唔介意講下之前份工點解會離職？因為呢度冇寫。」
「主要係因為覺得冇發展空間，啲人又好懶散，我自己做嘢嘅作風比較進取，亦都唔容許啲下屬咁hea，呢方面我嘅理念同舊公司有啲相反。」
先生，你見工搏表現先至講呢啲啫下話，唔好嚇我喎，我哋成班人都hea開㗎喎，你想點樣進取呀？不過佢臨尾又轉返個mode，講咗幾次搵工搵咗好耐，好期待盡快知道面試結果。喂你前言不對後語嘅，頭先咪話自己有另一個offer囉！
結果最後真係請咗呢位candidate，我係冇say嘅，好似入房問幾條問題，做下佈景版咁樣，其實我都要改口喇，因為呢位candidate亦順理成章入嚟做，成為我直屬上司，我到而家仲記得佢第一日返工個樣。
「Hello，乜你唔係HR？」
我：「我唔係呀，我叫Angela，當日都介紹過。」
「我知我知，我叫Duncan，我知你叫Angela，不過我唔知你係我下屬。」佢講嘢都變得好混亂，諗返轉頭，當日HR姐姐的確冇介紹過我嘅職位，行入房就一齊in，好難怪佢以為我係其中一個HR，但我真係冇機會解釋呀，同埋都唔知點樣講。
「咁你咪知我人工囉！」乜原來佢真係介意，我好想講當時唔知道佢哋會忽然傾起人工㗎！
我：「哈哈，唔記得咗喇。」我冇諗過佢咁直接，加上有其他同事喺附近，所以我唯有咁答。
「你冇同其他同事講吖嘛？」
我：「梗係冇啦！」
呢位新上司本身已經笑得好尷尬，跟住仲一秒黑面（因為佢戴嗰啲透明好似燒焊嘅口罩，好柒，所以我見到），真係唔關我事㗎，冇人想知你幾錢人工呀，你係manager吖嘛，$55,000好合理吖，就算你班細嘅唔知，應該都大約估到啦，唔通我會唔妥你人工高過我咩，啱唔啱先，笑得自然啲啦，我都唔知點樣處理㗎！
唔知係咪心理作用呢？我覺得呢位新上司好介意我知佢幾錢人工，亦好介意由下屬去負責in佢，我仲記得新上司interview嗰陣和藹可親個樣，一轉眼間，佢已經對我冇晒笑容，仲要黑口黑面，我細心觀察同埋留意過，佢對其他人唔係咁㗎！淨係對我嘅面口特別唔同。
而家同呢位新上司相處咗一個月多啲，佢對住我黑口黑面嘅情況似乎冇變，係咪驚我周圍爆佢人工呢？我好唔好同佢講唔會咁做呢？最衰佢又冇再提起呢件事，如果我走去特登提起好似更加唔恰當，表達得唔好仲衰多兩錢重。
個人認為HR安排唔係咁好，我明白佢唔識in走嚟搵我協助係正常，不過HR嘅角色應該要介紹下我嘅身份先，當時佢淨係同人介紹咗我叫Angela，然後就開始問問題，問問下仲擰過嚟示意我接落去。
同埋去到人工待遇呢啲咁私人嘅範疇嗰陣，HR應該請我出去迴避下，我嘅身份係唔應該參與呢一部分，從呢位新上司嗰句「乜你唔係HR？咁你咪知我人工囉！」已經完全feel到佢耿耿於懷，但我係無辜㗎，要嬲都係嬲個HR啦，做乜畀面色我睇喎！
不過我想講講，見工真係一場戲，乜春嘢自己做嘢嘅作風比較進取，唔容許班下屬咁hea，頂你啦！佢仲hea過我哋，返咗工先係個零月，有次我行埋去已經見佢上網睇劇啦，close都close唔切，然後又睥我，你自己手腳唔協調又唔夠敏捷關我咩事呀？
呢個新上司仲要搭正6點走，早過晒我哋成班同事，不過呢樣我就冇乜所謂，大家一齊hea都係一件好事，只係當時interview畀佢嚇親啫，講到好似好高壓咁，妖！其實知道咗佢幾錢人工，我自己嘅心理都唔多平衡，$55,000人工，做嘅嘢頂盡值$15,000，啲高級職員真係舒服。