公司個男同事阿Fred係百彈齋主，不過佢主要係彈女仔，而且重點批評人哋個樣，我哋office有50幾人，佔一半係女，全部畀阿Fred彈過晒：隔籬team個Elaine豬膽鼻、Sales個Suki死魚眼、Helen面無四兩肉、Kimmy鞋抽面、Olivia髮線高……真係無一倖免。
我係男仔都覺得咁樣好冇口德，因為佢連我哋嘅另一半都會批評，試過有男同事喺IG post咗同女友去迪士尼嘅合照，阿Fred睇完私底下同我哋講：「阿邊個條女好唔掂喎，火柴人咁，係咪營養不良呀？」佢另外仲彈過幾個男同事嘅女朋友同老婆，好在我冇add佢Facebook同IG，亦都唔明其他同事點解要畀佢add做朋友。
唔止嫌公司啲女唔夠靚㗎，阿Fred連女明星都彈一大餐：Stephy冇輪廓㗎喎、陳法拉呢啲好普通咋喎、你唔覺得麥明詩個鼻好奇怪咩……仲有好多數唔晒，簡單啲講，如果搵佢做選美評判真係大鑊，又腌臢又高要求又冇口德，仲有同事曾經咁講過：「阿Fred好似條條女都睇唔上眼，唔知佢自己個女朋友係點㗎呢？一定美若天仙啦！」
你哋係咪覺得阿Fred對女性有咁高要求，衡量「靚」嘅標準又set得咁高，佢本人一定係高大型男啦！錯晒，中肯去講，唔加個人形容詞，因為我有口德，阿Fred其實係肥仔嚟，唔係樣衰，五官正常，係個鼻大啲有少少似成龍，不過髮型就係冬菇cup似以前嘅洪金寶，高度ok，唔矮嘅，但由於係肥仔身型，冇肌肉，無論從男定女嘅角度出發，都唔會界定佢係一個靚仔。
咁究竟阿Fred哪來的自信去嫌盡天下女性呢？相信係好似嗰位同事所講，有一個好似天仙咁靚嘅女朋友啦，見得多靚嘢，望返其他女仔咪覺得俗不可耐囉，應該係咁。
不過呢個假設最近被推翻，話說我同兩個同事約埋去睇《永恆族》，咁睇完戲好自然就去醫肚，原來香港真係好細，我哋剛剛喺茶記坐低，口罩都未除，離遠已經見到阿Fred拖住個女仔入嚟，大家做咗咁耐同事一定認得啦，不過當時佢在明我哋在暗，我哋三個男仔即刻擰埋一邊，侍應仲要帶佢哋去對面斜角卡位坐低，阿Fred係背住我哋，反而佢條女就面向我哋，一除口罩……
嗱！我唔鍾意阿Fred咁冇口德，自己都唔可以做佢同一類人，只可以講句唔係靚女，以正常標準同埋世界觀嚟講，都係公司班女同事靚啲嘅，不過另外兩位同事就冇咁仁慈，其中一個話：「佢平時彈到啲女一文不值，我以為佢條女係咩天姿國色，會唔會係我太主觀，先入為主覺得佢女友一定係靚女，所以落差先會咁大呢？直情口味獨特喎！」
另一位同事就話：「唔關主唔主觀事，真係低於標準，唱首歌畀你哋聽～～～四眼哨牙凸下爬，E吔E吔唷～～～」
我：「咪咁口賤啦！」
同事：「下，咁叫口賤？佢平時話人豬膽鼻、鞋抽面、冇輪廓嗰啲點計？」
我：「佢冇口德唔代表我哋要同佢一樣㗎嘛！」
其實我哋食完已經刻意走先，點知去櫃位埋單嘅時候前面有個人叫外賣，又要等佢揀餐，又要等佢摷錢，企咗陣見到阿Fred食完行緊出嚟，今次佢見到我哋喇，仲即刻縮起拖住女朋友隻手，狀甚慌張，唔講以為佢見到啲二奶情婦，定啲嚟呀喂，我哋係男同事咋，唔使驚。
結果大家尷尬地打招呼，講埋啲廢話：「食飯呀？」「係呀。」「你呢？」「我嚟食飯。」
大家喺茶記拎住張單都係食飯啦，希望佢女朋友返去唔好嬲阿Fred突然鬆手，我明點解會有呢個本能反應，其實平時唔好做百彈齋主係咁踩啲女仔，大家咪唔會特別對你嘅女朋友有期望囉！