邊個話女人先至會講是非，我公司就有個男人比起八婆更加八婆，以下稱呼佢做KK，呢條友唔細㗎喇，三十幾歲人，仲要結咗婚，但正經嘢好少做，主要職責係呢度八嗰度八，向A打聽阿B嘅事，向C又打聽阿D嘅嘢，然後是非當人情周圍唱。
同事傾計佢又要走埋嚟聽，不過人人都知佢咩料㗎喇，例如喺pantry吹緊水，大家一見KK行入嚟就會鳥獸散，因為佢真係會豎起耳仔聽㗎，聽完仲要出去同其他人講，早幾日佢先行埋嚟話：「Taylor好似同人鬧交喎，頭先喺pantry聽到少少，知唔知係邊個？佢啲friend？定係客？」好心啦，人哋啲嘢關你鬼事咩！
KK仲好鍾意打聽人哋嘅家事，問同事結咗婚未？拍緊拖未？老公做咩？老婆做咩？你同人熟就話啫，有啲平時同KK都冇兩句，你問人咁多私事做乜啫？
有同事瀨過嘢，諗住講都冇所謂，透露咗自己老婆係做空姐，跟住惡夢就開始喇，每次有新聞話航空公司裁員，KK就會喺成班人面前問嗰位同事：「咦，阿嫂有冇事呀？有冇裁到佢？」輪唔到你關心啦係咪呀！
聽嗰位同事講，KK曾經問過佢老婆買機票有冇折？喂你有冇常識㗎，就算空姐買機票有折，你呢位KK先生又係邊位呀？親屬呀？
八卦人哋啲嘢都算，最多自己小心啲，但係KK會無中生有㗎！試過有位女同事著咗條連身裙返工，咁可能人哋有少少肉地，KK走去周圍同人講嗰位女同事好似有咗BB，仲要講到似層層，搞搞下傳返去個女同事耳邊，咁就梗係嬲到癲啦！
有人辭職，佢會問人去邊？幾錢人工？關你柒事咩！有新人入職，唔係佢個部門，呢條KK又問人之前喺邊度做？屋企住邊？有冇兄弟姊妹？你係人哋上司咩，你係HR呀？使唔使同你交代呀！
講起人工，KK係會一而再，再而三周圍八卦，仲要係打爛沙盆問到篤嗰隻，有個新仔可能唔知佢咩料，又缺乏社會經驗，竟然向KK講咗自己嘅月薪，結果全公司都知道晒，我去影印機拎print out都畀佢捉住嚟講，雖然間間公司都有八婆同事，不過大前提係呢個KK係男人嚟㗎喎，結咗婚有返咁上下年紀㗎喎，點解行為上會係一個有X嘅八婆咁㗎！
有班同事特登玩佢，因為KK成日追問人哋幾錢人工，嗰班同事故意講到比真實高咗50%，KK聽完之後好唔開心，除咗周圍唱之外，仲見佢個樣好似懷疑人生咁，猛咁話自己年資耐過對方，唔明點解差咁遠，最好笑係叫我一齊辭職：「呢度冇前途喎，不如集體遞信啦，如果夠人多，老細一定會正視，到時再嗌返高個價。」
我：「咁你遞信先吖。」
KK：「我諗住睇你哋頭呀！」痴Q線！推其他人辭工試水溫。
我：「但係我又唔覺自己人工特別低或者低過出面喎！你成日問我幾錢人工，咁其實你幾錢人工啫？」
KK：「我？我好低咋，你呢？你幾多呀？有冇25K？」呢啲咪仆街囉，一路要攞你啲料，自己就收收埋埋，Ok，陪你玩下。
我：「25K？入嚟嗰陣都唔止啦，過咗3字好耐喇。」
KK：「唔係啩，連你都高過我？」集體遞信就唔會喇，成班同事集體fake你過癮好多。
其實我以前都以為講是非嘅一定係女人，入咗嚟呢間公司先知道原來男人老狗都可以八卦到嘔，真係大開眼界。