老闆自資出書迫人買 每個員工要認購一本

你見過最自戀嘅人係點㗎?覺得自己好靚?得閒無事就照鏡?定係成日喺social media狂post大頭相?其實呢啲都係碎料,因為某程度上冇影響到任何人,而我老闆就唔同喇,佢走去自資出書,印咗幾百本迫員工認購,封面仲係佢著住西裝側側身懶係成功人士咁,好惡頂呀!

唔係我屈佢扮成功人士㗎,佢本書名真係叫《如何成為一位成功人士》,唔使搵喇,出面冇得買嘅,因為係老闆自己搵人印,聽講印咗500本,由於係佢走去求出版社,加上印刷量少,所以每本書嘅成本好貴,我哋「員工價」都要$200一本。

半年前嘅某一日,Admin好似啲Sales洗樓咁,拎住張紙走勻每個部門,對白係咁嘅:「老闆出咗書,希望我哋支持下,同埋可以從呢本書裡面了解多啲公司同埋老闆。」

見到Admin講嘢嘅聲音同語氣,我已經知道佢係被迫。

我:「好柒呀喂,個封面見到都唔開胃,點會有人搵佢出書㗎?」

Admin:「唔係人哋搵佢出㗎,老闆自資㗎,你哋一人買一本。」

我:「唔買得唔得呀?」

Admin:「冇話唔得,不過呢張form係記名,我淨係可以講咁多。」

我:「咁你買咗幾多本先?」

Admin:「一本已經好畀面啦,難為我阿姐要買3本呀!」

我:「你阿姐都幾擦鞋喎。」

Admin:「唔係擦鞋,係老闆叫每個department head買3本,所以你阿頭都要買3本。」

CLS!邊有得夾硬叫人買㗎!

不過你又唔好以為老闆係想昆水喎,佢嘅目的唔係錢,而係要威,我哋同事清咗100本左右啦,其餘400本就叫啲Sales分批拎去見客,盡量每個客都派一本,嗰排成個Sales Team叫苦連天,呀!差啲唔記得講,我就係其中一個Sales……

因為焗住要咁做,我最初都硬住頭皮攞去見客,有個客係咁樣同我講:「搞啲咁嘅嘢呀!拎返走啦!」

我:「我都唔想㗎,老闆叫我送出去,幫幫手啦!公事包裡面仲有幾本,好重呀,等陣仲要去荔枝角見幾個客。」

「不如我幫你加單買多啲貨啦,本書你拎走好唔好?封面好肉酸呀!」

見十個客,十個都叫我拎走,結果我屋企有成棟《如何成為一位成功人士》,老豆老母仲以為我入咗邪教,有乜辦法啫,墊煲底又唔係,包狗屎又嫌啲紙唔夠大張,諗住搵日得閒就捧去嗰啲廢紙回收囉!最慘係老闆問派晒未,我哋又一定要話派得七七八八,因為佢將派書同見客兩樣嘢掛勾,未派完即係見得唔夠多客吖嘛!

上星期老闆問我阿頭需唔需要加印,等大家搵到新客嘅時候可以送埋,我阿頭口快快答佢唔好,不過好識做咁加多句:「物以罕為貴吖嘛,太多就唔馨香㗎喇,你睇下啲名作家嘅書,通常出面都賣到斷晒市,咁先有型,如果比人見到書局仲有成大疊咪唔型囉,人哋以為滯銷添呀,第時真係有新客想要,我先割愛讓出嚟,每個department head有3本吖嘛!」

老闆:「咁又係,不過有potential啲客先好送喎,細客就唔好浪費本書喇。」

其實自信同自戀真係只差一線,好在我阿頭兜得靚,否則老闆再加印真係搞著我哋班Sales🤦🏻‍♂️

error: