職業兄弟呢壇生意有冇阻滯？少少啦，錢又邊有咁易賺吖！其中一次要飛走Rocky先接到張單，因為新郎哥話：「佢太高喇，企喺身邊影得我好矮。」
Rocky係高嘅，成個193咁嘅款，不過嗰次個新郎又真係過份矮細，都幾難唔高過佢，好在新娘叫埋自己細佬走去做兄弟團，最終勉強湊夠兩邊4對4，係Rocky慘啲囉，因為仲有一次都係個客嫌佢太高，綠葉太搶眼絕對唔係好事。
仲有一次婚禮差啲臨天光瀨尿，事件始源係朝早接新娘嘅時候，班姊妹要求玩嘅遊戲相當過份，唔知真係以為有私怨，首先係笠絲襪讀愛的宣言，其實呢種玩法幾無謂，結婚大日子要不斷影相同埋拍片，個新郎哥咁樣衰又成個頭亂晒，啲嘢拍出嚟都唔靚啦，唔係要留住最美一刻咩，點解要展現狼狽醜態呢！
緊接第二個遊戲係班姊妹溝咗杯唔知咩飲品，憑味覺我飲得出有苦瓜、辣椒醬、蝦醬，仲有啲稀爛嘅榴槤肉同唔知咩肉，莫名其妙又有臭豆腐味，順豐哥哥阿偉飲完即刻衝入廁所嘔，一路嘔一路流眼淚，我同新郎都忍唔住衝埋入去，阿偉不斷重複：「加錢！加錢！」
我同佢流淚眼望流淚眼，然後答：「加咗㗎喇……」
阿偉：「DLLM再加！一定要再加……」講完又嘔過。
新郎哥自己都唔好意思，拍拍阿偉膊頭話：「得，冇問題，一陣Payme畀你。」
件事未完，仲有第三個遊戲環節，呢個超侮辱，班女搽咗pat朱古力醬喺M巾上面，強調係Nutella，要新郎同兄弟瀨晒佢。
阿偉未嬲完又要瀨M巾啲屎，當場就發火：「我唔會瀨呀，要瀨你哋自己瀨！」
場面一度尷尬，最後出手相助嘅竟然係大妗姐，佢以「唔好誤咗吉時」為由，大嗌取消呢個遊戲快快脆脆接新娘，但係班姊妹依然凶狠，話兄弟唔瀨ok，新郎哥就一定要瀨，大妗姐想再度救駕之際，說時遲那時快，新郎哥突然捨身成仁，使出一招我不入地獄誰入地獄，一手搶咗條M巾劈頭就瀨！
新郎哥：「搞錯呀！又話係Nutella，咁苦既？」
成班姊妹一齊爆笑：「M巾就真係M巾，啡色嗰啲唔係朱古力，喺磨到變糊仔嘅中藥嚟㗎！」
即刻諗起張家輝瀨周星馳鞋底嗰一幕，唔明點解新郎哥咁都冇反面，究竟係太愛個新娘定係虧欠咗新娘？又究竟係班姊妹心理變態，定係同新郎哥有宿怨呢？其實玩新郎嘅環節又係一個白痴習俗，發明嗰個人一定要落地獄。
未入戲肉呀，高潮喺夜晚擺酒時出現，好心攝影師就剪咗M巾呢段啦，竟然喺朝拍晚播嘅時候大大個銀幕重溫經典，新郎班親戚睇到黑晒面，佢老豆仲想即時取消婚禮拉個仔走，主家席嘅氣氛好差，最後係新郎阿媽猛咁話：「算啦，算啦，後生冇分寸啫，唔好喺咁多人面前發脾氣啦，個仔好難做㗎！」
新郎個爸爸自己提早離場，事件告一段落，但非常不快，相信婚禮後大把手尾跟，我當時真係好驚爛尾收場。
另外有一次就係新郎嗰邊出事，嗰次出動咗兩個職業兄弟啫，就係我同Rocky，因為新郎另外有3個朋友出任兄弟，但到咗08:00接新娘嘅時間，新郎同佢3個friend竟然失蹤，電話又唔聽，留言又唔覆，好似人間蒸發一樣，後來有兩個姊妹落嚟搵人，走去問我同Rocky：「新郎哥呢？」
因為我哋著晒成套西裝有襟花，佢哋又著姊妹裙，唔需要認識都知道大家身份，可惜我真係唔知：「我都搵唔到佢呀，打咗好多次電話。」
其實錢就收晒㗎喇，但我都唔知點做，走又唔係，唔走又唔係，兩個姊妹返上樓先，留低我同Rocky食風，終於喺大約09:45收到新郎電話，佢話自己唔知醒，而家趕緊嚟喎……咁都得？
後來得悉新郎同佢3個兄弟前一晚去咗飲酒，醉醉地就去埋桑拿，仲要有邪骨嗰隻，所以就過晒鐘遲大到，當日嗰3個兄弟仲係咁講前一晚個技師點正點正，真係好唔尊重個婚禮。
擺酒當晚成張枱嘅人no show都見過，聽講係個親戚話佢嗰邊有長輩過身，以為過咗60日就可以去飲，點知有人提佢應該一年內唔可以出席囍宴，個新娘嬲到出煙：「預咗佢哋12位，婚禮當日先話唔嚟得，我真係唔明點解有人過身唔去得婚禮，仲要一年咁耐，如果我死咗，我都唔會想後人唔開心一年啦，呢啲咩規矩嚟㗎？」
係呀，我都唔明，仲要各處鄉村各處例，永遠冇標準答案。
刁鑽奇怪嘅場面見唔少，不過溫馨感人嘅囍宴都好多嘅，婚紗背後嘅甜酸苦辣，只有一對新人自己先最清楚，成日聽上一代講結婚要風風光光，但我有時會諗，風光一定代表嫁得好？唔擺酒就等於嫁得差？無論係順境或是逆境，富有或貧窮，健康或疾病，兩個人要真正幸福快樂，關鍵應該係點樣經營彼此嘅關係，而唔係花心思做一場show去滿足其他人。
我見過筵開30席嘅婚禮，六星級酒店搞，請咗個都幾紅嘅歌星嚟表演，但呢對夫妻唔夠半年就離婚；我亦有個表哥選擇唔擺酒，淨係簽紙註冊，而家佢兩公婆已經結婚12年，一直保持恩愛。
因為疫情嘅緣故，職業兄弟嘅生意喺兩年前一度暫停，當時手頭上有8張單全部退款，直至早幾個月先再接返生意，而職業姊妹嗰邊亦啱啱開咗第一張單，婚期係2022年5月，希望有機會再分享更多婚紗背後嘅故事。（完）