唔知邊個喺兩年前搞咗個forum，其實任何人都可以register同埋留言，只係呢個討論區純粹講我哋公司內部是非，而且website係一堆無意義嘅數字，所以街外人唔會搵到，自己人都要私下互傳先知道。
呢個秘密網基本上係同事之間嘅「樂土」，因為可以無拘無束爆料同埋發洩吖嘛，個個用晒假名，點鬧點講都冇問題，我都成日上去唱衰自己部門經理（當然會扭一扭字眼盡量唔暴露身份），跟住其他人又鬧埋一份，真係爽到爆，返工時間會偷偷用手提電話上，放工搭車又會上，心靈寄託嚟㗎！
喺秘密網裡面我哋揭發過好多office地下情，receptionist同sales team同事搭上咗，阿John同Mary喺街拖手斷正，仲有隔籬department個阿姐竟然同下屬拍拖，全部都逃唔過大家嘅法眼， 有人仲會喺秘密網指名道姓講邊啲女同事好正，搞埋選舉投票office嘅男神女神，真係好多gossip可以睇。
我哋仲幫好多高層改晒花名，例如淫魔、姣婆蓮、萬人斬、無人愛、光頭戟，係同事就自然會明㗎喇，一睇呢啲名已經知道講緊邊個。
最初收收埋埋，高層係唔知嘅，但久而久之就有二五仔爆出去，始終我哋公司多人，梗有啲刷鞋精報寸，就好似隔籬department個阿姐咁，佢同男下屬拍拖，兩個人關係咁close，知道有個秘密網係遲早嘅事。
不過有高層亂入仲好玩，鬧你就係想你睇到啫，如果留言入面出現「護主犬」，咁唔使問阿貴一定係佢本人，上次有人鬧Marketing個team head光頭戟就係咁，成班人鬧鬧下突然有個留言好正經咁講：「其實Danny（即係光頭戟個真名）唔係咁㗎喎，唔好人講你哋就信啦！」
嗱，你咁講係唔會令到我驚㗎，班同事只會更加群情洶湧，緊接落嚟嘅留言直頭正面挑機：
「Hello Danny，你好呀！」
「你都知自己叫光頭戟？好在仲有自知之明。」
「喂光頭戟，我DLLM呀！」
「都話光頭戟唔做嘢呃人工㗎啦，你睇佢幾得閒，辦公時間走上嚟洗白。」
另一個高層淫魔都有去秘密網睇post，仲低B到叫自己department啲人入房開會，警告唔好再喺上面屈佢性騷擾女同事，嘥氣啦！你愈係咁大反應，咪即係代表身有屎囉！隔日已經有人匿名出post話：「淫魔mon緊post，佢今日搭咗女同事膊頭未？」
早排老細知道咗呢個秘密網嘅存在，但處理手法反而幾好，某日佢出咗個post：「各位好，我係老闆，你哋嘅意見我都睇到喇」，因為最初未證實，所以有同事留言：「你係老闆？咁我係鄧炳強囉！」
點知老細真係回覆，仲影咗自己張員工證upload上去，搞到成班同事啼笑皆非，鬧公司嘅post佢會睇會覆，雖然好多都係擦邊球，避重就輕略略帶過，但起碼有互動，有時連爆料是非post都會加把嘴，投票選office男神女神佢又會參與。
有次開大會仲搞笑，老細無啦啦話：「好，有請公司嘅女神第一位Emily同我哋講幾句。」會議室內眾人起哄大笑，證明老細真係有睇秘密網而且好update，咁嘅處理真係世界級，好過光頭戟分身走上去洗白咁低招，聽講淫魔都收斂咗同埋冇咁猖狂，梗係啦，老細知道咗佢係咸蟲，仲敢明目張膽咩！
個人認為每間公司都應該有一個秘密網，用嚟發洩又好，互相了解又好，聽多啲聲音先會有進步，我哋身處嘅社會都係一樣，呢樣又封，嗰樣又封，訊息太單一就會變井底蛙，自我感覺良好有鬼用咩！
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
其實我哋都有《過來人》㗎🤣 最近仲新增咗畀Like同畀嬲嬲嘅功能👍🏻 有時間去睇下再一齊互動啦！
https://hkofficedaily.com/job-review-list/